ЦХИНВАЛ, 9 июн – Sputnik, Плиты Фатимæ. Хуссар Ирыстоны низæфхæрд адæмæн инвалидты реабилитацион центр "Точка опоры" сарæзта æвдæм æрсидты парламентон æвзæрстыты хайад райсыны фадат. Уыдонæй фыццаг Гафезы уынджы цæрæг Уалыты Зоя схъæлæс кодта 16-æм æвзарæн фадыджы. Уый ссис фадыджы 251 хъæлæсгæнæг.
"Абон дыккагæй райгуырдтæн. Мæ чызг-иу схъæлæс кодта мæ бæсты, фæлæ бæллыдтæн мæхæдæг аннæты æмрæнхъ бацæуын фадыгмæ æмæ схъæлæс кæнын. Реабилитацион центр "Точка опоры"-йы хистæр Хъæцмæзты Лео мын баххуыс кодта ацы хъуыддаджы, президенты æххуысæй сарæзтой мæ фатермæ пандус – мæ цард райста ног ахорæнтæ", - загъта Уалыты Зоя.
Зояйæн кæд ныридæгæн фæуд кæнынц аразын пандус, уæддæр йæ æддæмæ рахизынæн нырма хъæуы афыдæбон кæнын. Пандус у цæттæ, ныридæгæн ахуырст цæуы, фæлæ фатеры дуæртты къаласка нæ хизы, уымæ гæсгæ йæ ʻрахызт æнæ æххуысæй нæ цæуы.
Ӕвзарæн фадыгмæ бацæуæны та æмбæлынц ног цæлхдурыл – Хуссар Иры административон бæстыхæйттæ сахъат адæмы уавæртæм арæзт не сты, уымæ гæсгæ æххуысмæ бацыдысты хъæлæсгæнджытæ æмæ æхсæнадон фæтк хъахъхъæнджытæ. Уынгмæ рахизгæйæ сылгоймагæн йæ зæрдæ уынгæг кæны æнкъарæнтæй.
"Аст азы дæргъы уыддæн мидæг ахæсты, ныр рахызтæн дунемæ", - бафтыдта Зоя.
Инвалидон къаласкатыл чи ис, уыдон фыццаг хатт исынц хайад æвзæрстон процессы иумæйаг уавæрты, уымæй размæ се ʻмбæстагон хæс æххæст кодтой хæдзары.
Ныридæгæн ма иу ахæм пандус арæзт цæуы ноджы иу инвалиды хæдзармæ.
"Ис мæм авд куырдиаты къуындæг авналæнтимæ адæмы бинонтæй, æз сын сарæзтон проекттæ, президент радта æххуысы ныфс. Абон фыццаг пилотон проект арæзт æрцыд. Дыууæ низæфхæрд адæймаджы сæххæст кодтой се ʻмбæстагон хæс. Уый у фыццаг къахдзæфтæй иу уæгъдвæндаг æхсæнадмæ инвалидтæн", - загъта Sputnik инвалидты центр "Точка опоры" хицау Хъæцмæзты Лео.
Низæфхæрд адæмæн центр "Точка опоры" арæзт цæуы Белинскийы уынгыл. Ам Хъæцмæзты Лео йæ хисæрмагонд хæдзар рацарæзта центрмæ. Фидæны йæ фæнды уым скæнын канд улæфыны нæ, фæлæ ма куысты фадæттæ дæр.
