ЦХИНВАЛ, 7 окт - Sputnik. Бӕрӕгбонон мадзӕлтты фӕлгӕтты, кӕцытӕ нывонд сты Уӕрӕсейы фыццаг ирон минӕварадыл 270 азы сӕххӕстӕн, Санкт-Петербурджы ацӕудзысты презентацитӕ, зонадон докладтӕ, документалон кинонывты равдысттӕ ӕмӕ мастер-класстӕ. Мадзӕлттӕ уагъд цӕудзысты Уӕрӕсейы культурон столицӕйы 22-24 октябры, хъусын кӕны Хуссар Ирыстоны президент ӕмӕ хицауады пресс-службӕйы кусӕг Дзуццаты Тамара.
"23 октябры уагъд цӕудзӕн мадзалы официалон баконд. Бӕрӕгбонон мадзӕлттӕ райдайдзысты Ирыстоны тыххӕй презентацион кинонывы равдыстӕй. Бавдисдзысты зонадон докладтӕ иумӕйаг темӕйыл : "Ирыстон: знон, абон, сом", афтӕ ма Туаты Теминайы киноныв Хӕххон Аланийы тыххӕй. Бон балхынцъ уыдзӕн Ирыстоны историйы фӕдыл экспонаттӕ ӕмӕ ӕрмӕджыты равдыстӕй", - дзырдӕуы хъусинаджы.
Мадзӕлтты фӕлгӕтты Ирыстоны историйы фӕдыл докладимӕ ралӕудзӕн Хуссар Ирыстоны фӕсарӕйнаг хъуыддӕгты министр Медойты Дмитрий, афтӕ ма Хуссар Ирыстоны паддзахадон университеты проректор Тедеты Зӕлинӕ.
Уый фӕстӕ ацӕудзӕн бӕрӕгбонон мадзӕлтты хайадисджыты пресс-конференци. Мадзӕлттӕ балхынцъ уыдзысты фӕсарӕйнаг хъуыддӕгты министр Медойты Дмитрийы номӕй официалон райстӕй.
Фыццаг ирон минӕварадӕн 1749-1751 ӕзты, кӕцыйы сӕргъ лӕууыд Магкаты Зураб, бантыст уӕззау политикон уавӕрты рӕстӕджы равдисын Уӕрӕсейӕн Ирыстонимӕ цӕдисы ӕнӕмӕнг хъӕуындзинад.
