Гӕбӕраты Ян
2017 азы информацимӕ гӕсгӕ, Цхинвалы психоневрологон диспансеры хыгъдыл лӕууынц 1727 адӕймаджы – республикӕйы цӕрджыты 3%. Ацы бӕрӕггӕнӕн ӕввахс у дунейы астӕуккаг бӕрӕггнӕнтӕм, фӕлӕ республикӕйы цӕрӕгады масштабты, медикты ныхӕстӕм гӕсгӕ, хӕссы эпидемион характер.
Цхинвалы психоневрологон диспансеры сӕйраг дохтыры ныхӕстӕм гӕсгӕ, республикӕйы фылдӕр ис невротикон хӕлды низтӕ. Афтӕ ма статистикӕмӕ гӕсгӕ фӕфылдӕр сты фӕстравматикон хӕлды низтӕ, уый хонынц "вьетнамский синдром".
"Иууыл арӕхдӕр низтӕ Хуссар Ирыстоны – шизофрени, зондӕй фӕстӕзад, невроз, депресси ӕмӕ фӕстравматикон хӕлд. Низты динамикӕ алыхатт дӕр рӕзы фӕстхӕстон периоды, фӕлӕ абоны бон сӕ нымӕц фӕкъаддӕр ис", - радзырдта Абайты Ревмира.
Бынӕттон психиатрийы куыст у зын. Сӕйраджыдӕр, нӕм нӕй психиатрон рынчындон. Пациентты Мидхъуыддӕгты министрады патрулон хӕдтулгӕты фӕсдзыдимӕ арвитӕм Цӕгат Ирыстонмӕ.
Афтӕ ма цӕрджытӕн вӕййы мидӕггагон барьер уды низты фарстыты фӕдыл.
"Менталитетмӕ гӕсгӕ адӕм ӕфсӕрмы кӕнынц сӕ проблемӕ ӕмӕ дохтыртӕм бацӕуынӕй. Ахӕм пациенттӕ ацӕуынц республикӕйӕ хоскӕнынмӕ. Уыдон, ӕвӕццӕгӕн, нӕ зонынц, махмӕ уӕддӕр кӕй бацӕуы информаци", - банысан кодта Абайты Ревмира.
Уымӕй дарддӕр ма республикӕйы ис пациентты иууыл уӕззаудӕр къорд – социалон тӕссаг рынчынтӕ. Уыдон сӕхӕдӕг нӕ ӕрбацӕуынц рынчындонмӕ.
"Милицийы кусджыты ӕххуысӕй сӕ ӕрбакӕнӕм рынчындонмӕ ӕмӕ дарддӕр скъуыддзаг кӕнӕм, нӕхимӕ сӕ ныууадзӕм, ӕви сӕ арвитӕм хоскӕнынмӕ Цӕгат Ирыстонмӕ", - загъта уый.
Ныхасы кӕрон Абайты Ревмира раарфӕ кодта республикӕйы цӕрджытӕн психикон ӕнӕниздзинады боны фӕдыл.
