ЦХИНВАЛ, 15 апр – Sputnik, Плиты Фатимӕ. Хуссар Ирыстоны ныр дыккаг къуыри ӕхгӕд сты дуканиты фылдӕр бӕрц. Арендӕйы бӕрны чи ис ӕмӕ банктӕй ӕфстауы фӕрӕзтӕ чи райста, уыдон катайы бацыдысты - амалиуӕггӕнджытӕн рӕзынц сӕ хӕстӕ, COVID-19-ӕй бахизыны мадзӕлттӕ уыдон хонынц чысыл бизнесы хурныгуылдыл.
Марты кӕрон хицауады барамындӕй Хуссар Ирыстоны ӕппӕт базарадон объекттӕ сӕхгӕдтой карантинмӕ, тобӕ нӕ аххӕссыд ӕрмӕст хӕлцад ӕмӕ цардуагон продукттӕй чи базар кӕны, уыцы дуканитӕ ӕмӕ афтектыл.
Цхинвалы хӕдтулгӕты хӕйтты дуканийы хицау разы нӕу ног мадзӕлттимӕ.
"Адӕм цӕуынц дуканитӕм, уынгтӕм. Дыууӕ къуыри нӕ кусӕм, ноджы дыууӕ къуыри уыдзыстӕм ӕхгӕд. Вирусы тас нӕ уыдзӕн стырдӕр, адӕм ма уӕлӕмхасӕй цалдӕр дуканимӕ куы бацӕуой, уӕд", - ныффыста дуканийы хицау йӕ фарсыл социалон хызӕджы.
Ӕнгӕс уавӕрты сты, дарӕсӕй чи базар кӕны, уыцы амалиуӕггӕнджытӕ дӕр. Астӕуккаг нымадмӕ гӕсгӕ, столицӕйы централон уынгты дуканитӕн хатӕны арендӕ лӕууы 10-100 мин сомы мӕйы мидӕг. Кӕд ӕфснайӕн банк адарддӕр кодта хӕс фиды рӕстӕг, уӕд хисӕрмагонд хӕдзӕртты хицӕуттӕ сӕ фиддонтӕ, кӕй зӕгъын ӕй хъӕуы, нӕ ивынц.
"Нӕ дуканийы иууыл фылдӕр ӕмрӕстӕджы вӕййы фондз адӕймаджы, афтӕмӕй хӕлцады дуканиты адӕмӕй азмӕлӕн дӕр нӕй. Ӕрвыл мӕй фидӕм 14 мин сомы арендӕ, хорз у ӕмӕ банк адарддӕр кодта фидыны ӕмгъуыд, фӕлӕ чидӕртӕ ӕфстауы райстой уӕрӕсейаг банкты, уыдон та бахаудысты ноджы æвзæрдæр уавæры", - дзуры дарæсы дуканийы хицау Кокойты Мæдинæ.
Амалиуæггæнджытæ ма æнæразыдзинад æвдисынц, тобæйы мадзæлттæ кæуыл аххæссыдысты, уыдон нымхыгъды уæлæнгай арæзтмæ.
"Мах уæй кæнæм хæдтулгæйы маслатæ æмæ нæ сæхгæдтой. Маслатæ дæр хауынц æртаджы номхыгъдмæ, ныр бензин уæй кæнынц сæрибарæй, масла та ис тобæйы. Афтæмæй уый дæр косметикæ нæу, æнæ уымæй хæдтулгæ нæ кусы", - дзуры магазины хицау Дмитрий.
Уый ма радзырдта, фиддонтæй сæ кæй ссæрибар кодтой, уый дæр проблемӕ кӕй нæ лыг кæны.
"Кусæгæн йæ куыстмызд куыннæ радтон,уæд ацæудзæн, мæ стæй æз кæд ссардзæн цæттæ специалист, кæцы у хорз консультант?", - катай кӕны дуканийы хицау.
