ЦХИНВАЛ, 23 мар – Sputnik, Плиты Фатимæ. Хуссар Ирыстоны культурӕйы министрады заказмӕ гӕсгӕ мыхуыр ӕрцыд этнограф ӕмӕ нывгӕнӕг Тугъанты Махарбеджы куыстыты репродукцитимӕ къӕлиндар. Уый ӕрӕмных кодтой зындгонд ирон нывгӕнӕджы райгуырды 140-азон юбилеймӕ, фехъусын кодта Sputnik культурӕйы министр Зассеты Жанна.
"Тугъанты Махарбеджы 140-азон юбилеймӕ рацыд къӕлиндар. Бузныг дзурын, чидӕриддӕр ыл бафыдӕбон кодта, уыдонӕн, редакторӕй райдайгӕйӕ ӕмӕ корректорыл фӕугӕйӕ. Къӕлиндар рауад тынг хорз", - загъта Зассеты Жанна.
Къӕлиндар рацыд 500 экземплярӕй, сӕ иу хай райсдзысты культурӕйы къабазы кусджытӕ, иннӕ хай та арвитдзысты Дзӕуджыхъӕумӕ.
"Дӕс азы размӕ ма рауагътам Тугъанты Махарбеджы нывтимӕ къӕлиндар, уӕд дзы бацыд йӕ куыстыты 23 репродукцийы, фӕлӕ ацы рауагъды ис ӕндӕр къуыстытӕ, уымӕн ӕмӕ нывгӕнӕгӕн баззад стыр бынтӕ. Тынг цымыдисон куыст у, мах ногӕй ӕнгомдӕр зонгӕ кодтам нывгӕнӕгимӕ", - радзырдта рауагъды редактор Хъоцыты Андрей.
Къӕлиндары мыхуыр ӕрцыд Тугъанты Махарбеджы куыстыты репродукцитӕ, кӕцытӕ сты Хуссар Ирыстоны национ музейы ӕмӕ Цӕгат Ирыстоны Тугъанты Махарбеджы номыл музейы хӕзнадоны ӕмӕ газет "Республикӕ"-йы архивӕй.
