ЦХИНВАЛ, 2 авг — Sputnik, Козаты Дианӕ. Хуссарирыстойнаг фыссӕг Тадтаты Тамерлан фӕцис куыст йӕ радзырдты радон ӕмбырдгондыл. Чиныг хуыйны "Иди сюда, парень" Тамерлан загъта Sputnik, афтӕ ма кӕй хуыйны ӕмбырдгонды радзырдтӕй иу.
Тадтаты Тамерлан у хуссарирыстойнаг фыссӕг, кӕцы у зындгонд ӕрмӕст Ирыстон ӕмӕ Уӕрӕсейы нӕ — йӕ сценаримӕ гӕсгӕ ист цыбырметражон нывӕфтыд фильм "Суадон" 2015 азы ӕвдыст ӕрцыд 68-ӕм Каннаг фестивалы.
Уый у Мӕскуыйы фысджыты цӕдисы уӕнг, престижон литературон конкурсты лауреат. Йӕ уацмысты фылдӕр хай у нывонд Хуссар Ирыстоны адӕмы тохӕн сӕ сӕрибардзинад ӕмӕ хӕдбардзинады сӕрыл. Чиныг иууылдӕр конд у прозӕ ӕмӕ радзырдтӕй. Тамерлан ӕрмӕст ӕвдисӕн нӕ уыд Хуссар Ирыстоны 1989 — 2008 азты цӕуӕг цаутӕн, фӕлӕ ма йӕхӕдӕг иста хайад хӕстон архӕйдтыты, цалдӕр хатт фӕцӕф.
"Мӕ ног чиныг хуыйны "Иди сюда, парень". Ис мын радзырд, цыран дзырд цӕуы реалон историйыл, кӕцы мыл ӕрцыд 90-ӕм азты райдайӕны. Чиныг иууылдӕр арӕзт у прозӕ ӕмӕ радзырдтӕй. Ис афтӕ зӕгъӕн, ӕмӕ у роман радзырдты, уымӕн ӕмӕ дзы алцыдӕр ӕмӕ алчидӕр сты кӕрӕдзиуыл баст, хъайтартӕ иууылдӕр хизынц иу радзырдӕй иннӕмӕ", — загъта фыссӕг.
Йӕ ныхӕстӕм гӕсгӕ, ацы чиныг у хуымӕтӕг ирон лӕппутыл, 90-ӕм азты райдайӕны уыдон куыд тох кодтой Хуссар Ирыстоны сӕрибардзинад ӕмӕ хӕдбардзинадыл. Ӕмбырдгондмӕ цы радзырдтӕ бацыд, уыдон иууылдӕр сты фыст реалон цауты бындурыл.
"Кӕцыдӕрты дзы мӕхӕдӕг уыдтӕн хайадисӕг ӕмӕ мӕхи цӕстӕй уыдтон, нӕ лӕппутӕ куыд хъахъхъӕдтой нӕ горӕт, нӕ республикӕ. Ацы радзырдты нӕй пафос ӕмӕ ӕвдисгӕ хъайтардзинад.
Фӕлӕ сӕ персонажтӕ — реалон хъайтартӕ, абон сты рохгонд", — дзуры Тамерлан.
Ирон фыссӕджы ног чиныг рауадзынӕн, кӕцы мыхуыр ӕрцӕудзӕн Мӕскуыйы, хъӕуы 200 000 сомы. Тамерлан бахатыд йе мбӕлттӕ ӕмӕ зонгӕтӕм социалон хызӕджы Facebook, ӕххуысы фӕдыл.
Ныфс ӕй ис, се ′ххуысӕй рухсмӕ кӕй фӕзындзӕн "хъайтарты тыххӕй ӕцӕг чиныг, уӕды бонты уникалон къамтимӕ".
Ныридӕгӕн, ацы ӕнӕмӕнгхъӕуӕг суммӕйӕн йӕ фылдӕр хай ӕрцыд ӕмбырд, йӕ рауадзыны тыххӕй финансон ӕххуыс бакодтой Хуссар Ирыстоны парламенты спикер Бибылты Анатолий ӕмӕ
Цӕгат Ирыстоны хицауады раздӕры сӕрдар Тӕкъоты Сергей, афтӕ ма фыссӕджы ӕмгӕрттӕ.
Фарон Тадтаты Тамерланы радзырдты ӕмбырдгонд "Избранные рассказы" ("Равзаргӕ радзырдтӕ") бахаст ӕрцыд ӕхсӕнадӕмон литературон конкурс "Русская премия"-йы даргъ номхыгъдмӕ. 2008 азы ма фыссӕг иста хайад ацы конкурсы ӕмӕ бацахста дыккаг бынат номинаци "Малая проза"-йы.
