ЦХИНВАЛ, 6 окт — Sputnik, Козаты Диана. Фильмты студи FARN MOVIE ӕмӕ интернет канал Iudzinad студи Интроспективаимӕ иумӕ рауагъта ног нывӕфтыд фильм "БАЧА". Фильмы сценарий, кӕцы бындуриуӕг кӕны реалон цаутыл, ныффыста ирон режиссер, театр ӕмӕ кинойы актер, фильмты студи FARN MOVIE саразӕг Дыгъуызты Алан.
Дыгъуызты Аланы раздӕры режиссерон куыстытӕ — фильм "Фӕсайдзӕ — амӕлдзӕ", цыбырметражон фильм "Воскресенье" — райстой цалдӕр престижон кинопремитӕ.
Ног киноныв ист цӕуы Мӕскуыйы центры. Дыгъуызты Алан радзырдта Sputnik, киноныв кӕй ӕвдисы уӕззау хъысмӕтимӕ чысыл адӕймаджы ӕмӕ йӕ уарзты истори.
"Мах цы адӕймагыл ӕрдзурдзыстӕм, уый хъысмӕт у уӕззау дӕр ӕмӕ рог дӕр ӕмрӕстӕджы. Уым амонд ӕмӕ æнамонддзинад ӕрцардысты иу хӕдзары. Уыцы хӕдзар та у Бача", — дзуры режиссер.
Фильмы сӕйраг роль — Дильшоты (фӕсномыгӕй Бача), хъазы театр ӕмӕ кинойы актер Годзойты Батраз, кӕцы телекӕсджытӕн у зонгӕ популярон уӕрӕсейаг сериалтӕ "Дар", "Лесник", "Глухарь"-ы рольтӕй.
"Батрадз у тынг курдиатджын актер, кӕцыйӕн бантыст тынг реалонӕй сӕххӕст кӕнын фӕлгонц. Куыддӕр фыццаг кадр систам, афтӕ исӕн къорды дисы баппӕрста йӕ хъазт. Ныр нӕ дызӕрдыг кӕнын, кӕй нын бантысдзӕн кӕсӕджы онг кинонывы мидис фӕхӕццӕ кӕнын", — загъта Дыгъуызты Алан.
Фильмы исӕн процесс райдыдта октябры. Режиссеры ныхӕстӕм гӕсгӕ, истори у тынг спецификон, вазыгджын. Сфӕлдыстадон къорд аскъуыддзаг кодта, ӕмӕ йӕ реализаци кӕныны рӕстӕджы дӕр кӕй хъӕуы спайда кӕнын ӕнахуыр фӕрӕзтӕй. Дыгъуызты Аланы ныхӕстӕм гӕсгӕ, исӕн къорд спайа кӕндзӕн реалистон фӕрӕзтӕй.
"Кӕй зӕгъын ӕй хъӕуы уый киноныв у, фӕлӕ сӕйраг акцент уыдзӕн ӕвӕрд сӕйраг хъайтарыл, кӕсӕг цыма йӕхӕдӕг иу кӕнӕ иннӕ архайд цы фӕзуаты цӕуы, уым йӕхӕдӕг исдзӕн хайад — ахӕм эффектыл уыдзӕн арӕзт киноныв", — банысан кодта уый.
Режиссеры ис ныфс, куыд йӕ раздӕры куыстыты, афтӕ та йын ныр дӕр кӕй бантысдзӕн саразын афтӕ, цӕмӕй ног кинонывы сӕйраг хъайтар бандава кӕсӕгыл ӕмӕ йын бакӕна йӕ цӕстытӕ бирӕ хъуыддӕгтӕм.
Режиссеры ныхӕстӕм гӕсгӕ, фильмӕн уыдзӕн бӕрзонд визуалон гъӕд, уымӕн ӕмӕ йӕ оператор у йӕ хӕлар ӕмӕ ӕмвӕндон Кӕсойты Алан, кӕцыимӕ иумӕ куыстой йӕ иннӕ кинонывтыл дӕр.
