ЦХИНВАЛ, 19 май — Sputnik, Хъотайты Мария. Хуссар Ирыстоны абитуриенттæй уæлдæр ахуырадон уагдон æмæ факультет чи нæма равзæрста, уыдоны сабаты, 20 майы фæхондзысты Цæгат-Кавказаг хæххон-металлургон институтмæ (ХМИ) "гом дуæртты бонмæ", фехъусын кодтой Sputnik Ахуырады министрады.
Факультеттимæ базонгæйæ дарддæр ма, хистæр къласты ахуыргæнæнинæгтæм æнхъæлмæ кæсы институты историйы фæдыл документалон фильмы равдыст æмæ концертон программæ.
"Нæ абитуриенттæн, Цæгат Ирыстоны æмæ Кæсæг-Балхъары хистæркъласонты æмрæнхъ, æрвылаз дæр рахицæн кæнынц бынæттæ ацы институты. Ацы къуырийы кæрон мах афæндараст уыдзыстæм Дзæуджыхъæумæ "гом дуæртты бонмæ", цы ран махыл алыхатт дæр сæмбæлы ахуырады хайы фæдыл проректор Гæбæраты Олег, ауадзы нын экскурситæ факультеттыл, радзуры куыд, кæм æмæ сæ цæуыл цайдагъ кæнынц. Уый фæстæ нæ абитуриенттæй чидæртæ аскъуыддзаг кæны, кæдæм бадæтдзысты сæ документтæ", — загътой Ахуырады министрады.
Министрады кусæджы ныхæстæм гæсгæ, гом дуæртты бон раздæры æзты баххуыс кодта сæ равзæрст саразын Цхинвайлаг абитуриенттæн, кæцытæ æнтыстджынæй ахуыр кæнынц уæлдæр ахуырадон уагдоны.
Абитуриенттæн радзурдзысты институтмæ бацæуыны уагæвæрдыл, цы документтæ хъæуы æрбавдисын æмæ афтæ дарддæр.
