ЦХИНВАЛ 22 дек— Sputnik, Уалыты Диана. Цхинвалы æрбайгом Мæскуыйаг гом институты филиал, кæцы дæтты фадат республикæйы цæрджытæн æнæаргъ уæлдæр ахуырад райсын, радзырдта Sputnik ахуырадон уагдоны администратор Джиголаты Наталья.
Студенттæн ис фадат райсын æххæст уæлдæр ахуырад политологи, психологи, арæзтад æмæ æндæр къабæзты.
"Бацæуæны хуызы студенттæ иууылдæр хъуамæ рацæуой онлайн курс паддзахады теорийы фæдыл. Курс каст фæуыны фæстæ уыдонæн уагъд цæудзысты онлайн курстæ равзаргæ профессийы фæдыл. Алы курсы кæрон дæр студент рацæуы тест, кæцыйы хатдзæгтæм гæсгæ йын нывæрынц нысан. Ахуыр æмæ зонындзинæдтæн аргълæвæрд сты атоматизацигонд", — загъта Наталья.
Уæлдæр ахуырадон уагдоны ахуыр цæуы бакалавриаты программæмæ гæсгæ – студент ахуыр кæны цыппар азы. Каст фæуыны фæстæ рауагъдонæн лæвæрд цæуы уæрæсейаг диплом.
Джиголаты Натальяйы ныхæстæм гæсгæ, ныридæгæн университеты ахуыр кæнынц 14 студенты психологи æмæ юриспруденцийы фæдыздæхтты. Институтмæ бацæуынæн хъæуы æрбавдисын паспорт æмæ раздæр райсгæ ахуырады тыххæй документы копи.
