ЦХИНВАЛ, 2 апр — Sputnik, Гæбæраты Ян. Зындгонд бритайнаг журналист Грэм Филлипсы документалон киноныв "Дыууæ къуыри Хуссар Ирыстоны" мыхуыр æрцыд къуырисæры авторы YouTube-каналыл. Ацы фильм ссис Филлипсы æртыккаг документалон куыст Хуссар Ирыстоныл, кæцы систа фарон декабры, фæсарæйнаг хъуыддæгты министр Медойты Дмитрийы фæхуындмæ гæсгæ йæ балцы рæстæджы нæ республикæмæ.
Документалон куысты монтажыл бахъуыд æртæ мæйæ фылдæр. Филлипс йæхæдæг Sputnik куыд радзырдта, афтæмæй уый тырныдта, цæмæй финалон вариант уа иттæг дырыс æмæ рæстаг. Уымæн æмæ интернеты ис тынг цъус объективон информаци Хуссар Ирыстоны тыххæй, уæлдайдæр та 2008 азы цауты тыххæй.
"Хуссар Ирыстоныл тынг стæм хатт дзырдæуы дзыллон информацион фæрæзты, Ныгуылæны та, ахæм бæстæ ис, уый зонгæ дæр ничи кæны. Уый та тынг хъыг у, уымæн æмæ темæ тынг уæрæх у, ам бирæ цæуылдæрты ис радзурæн", — банысан кодта Филлипс.
Филлипсы амæй размæйы куыст англисаг æвзагыл 2008 азы хæсты тыххæй журналисты ныхæстæм гæсгæ, не сси популярон æмæ сæвзæрын кодта æппæрццаг реакци Гуырдзыстоны.
"Видеойы бын комментариты уыд тынг бирæ æфхæрæн ныхæстæ æмæ уайдзæфтæ, зæгъгæ, мын чидæр бафыста. Ӕз дæн дзырды сæрибардзинады фарсхæцæг, уымæ гæсгæ комментаритæ не ′ппарын. Фæлæ мæ фæнды зæгъын, уæдæй фæстæмæ æз нал никæцы дзыллон информацийы фæрæзимæ, мæ куыст иууылдæ арæзт цæуы краудфандингы бындурыл — мæ кæсджыты барвæндон мысайнæгтæй", — загъта Филлипс.
Журналист загъта бузныг Хуссар Ирыстоны цæрджытæн сæ хъарм райст æмæ уазæгуарзондзинады тыххæй æмæ загъта, зæгъгæ, кæд лентæ уа æнтыстджын, уæд æй фæнды республикæмæ æрæздæхын æмæ репортажты ноджы иу сери бацæттæ кæнын.
"Хицæн бузныг мæ фæнды зæгъын Анна Федововайæн, кæцы мын баххуыс кодта монтажимæ. Уый йæхæдæг Хуссар Ирыстоны уыд 2009 азы æмæ йын ацы лентæ у ахсджиаг", — загъта журналист.
