ЦХИНВАЛ, 25 мар - Sputnik. Бизнесментӕн, кӕцытӕ фидар кӕнынц кусӕгон бастдзинӕдтӕ Хуссар ӕмӕ Цӕгат Ирыстоны хсӕн, хъӕуы бакӕнын алыгъуызон ӕххуыс. Уый тыххӕй фехъусын кодта РХИ вице-премьер – экономикон райрӕзты министрады сӕргълӕууӕг Бекъойты Геннадиимӕ фембӕлдыл йӕ цӕгатирыстойнаг коллегӕ Томайты Хъазбег.
Бекъойты Геннадий кусӕгон балцы уыд Дзӕуджыхъӕуы, цы ран ӕрдзырдта Томайты Хъазбегимӕ Хуссар ӕмӕ Цӕгат Ирыстоны экономикон ӕмархайды фадӕттыл, хъусын кӕны хицауады пресс-службӕ.
"Кӕй зӕгъын ӕй хъӕуы, мах нырма хъӕуы ауадзын рабадт уӕрӕх форматы ӕмӕ снысан кӕнын фадгуытӕ ӕмӕ хъуыдытӕ, кӕцытӕй райсдзыстӕм хорз фӕстиуджытӕ. Цӕвиттонӕн, проект "Аланийы ӕхсӕр" райдыдтой реализаци кӕнын ӕрмӕст Цӕгаты нӕ, фӕлӕ Хуссар Ирыстоны дӕр. Уырны мӕ, ахӕм ӕмгуыстады цӕвиттонтӕ кӕй хъуамӕ уой фылдӕр", - загъта цӕгатирыстойнаг министр.
Уымӕй дарддӕр, балцы фӕлгӕтты Бекъойты Геннадий базонгӕ ис чысыл ӕмӕ астӕуккаг куыстуӕттӕн финанстӕ дӕттыны фонд, кредитон гарантиты фонд, экспортӕн ӕххуысы центр, центр "Мой бизнес" ӕмӕ РЦИ-Аланийы инвестицион райрӕзты корпорацийы куыстимӕ.
"Цӕгат ӕмӕ Хуссар Ирыстон хъуамӕ лӕмбынӕг бакусой ӕмгуыстадыл экномикон къабазы. Махӕн ис потенциал, кӕцы гом кӕны хорз фадӕттӕ дыууӕ республикӕйӕн", - радзырдта уый.
Хуссарирыстойнаг вице-премьер банысан кодта, республикӕйы сӕ цӕст кӕй ӕрдардзысты дзӕуджыхъӕуккаг коллегӕты фӕлтӕрддзинадмӕ ӕмӕ спайда кӕндзысты сӕ кӕцыдӕр методтӕй.
