ЦХИНВАЛ, 21 апр — Sputnik, Плиты Фатимӕ. Хуссарирыстойнаг хосгӕнӕн суар "Аландон" ӕввахс рӕстӕджы фӕзындзӕн Мӕскуы, Санкт-Петербург ӕмӕ Дзӕуджыхъӕуы дуканиты. Дон уадзы бынӕттон компани "Атей" Дзауы районы Згъубиры хъӕуы суарӕй.
Донуадзыны амалиуӕгад "Атей" Хуссар Иры фӕзынд цыппар азы размӕ, уӕд сӕ уадзгӕ продукци — минералон дон хуынд "Суар". Райдайӕны компанийы авналӕнтӕ уыдысты къуындӕг, дон уӕй цыд ӕрмӕстдӕр Хуссар Иры.
Ныридӕгӕн хосгӕнӕн дон кӕцӕй ист цӕуы, уым — Згъубирмӕ хӕстӕг Урс Туалты комы суадоны цур — срӕвдз ис ног кондад, цыран ӕрӕвналдзысты суар "Аландон" уадзынмӕ.
"Атей"-йы директор Босыкты Владимир куыд радзырдта Sputnik, афтӕмӕй боны дӕргъы компани уадздзӕн 15 мин авджы дон.
"Згъубиры суадон иу суткӕйы дӕтты 60 тонны дон, уымӕй нӕ бон у уадзын 40 мин авджы онг дон, фӕлӕ уал фыццаг рады ӕрлӕууыдыстӕм 15 мин авгыл, уыдонӕн сӕ фылдӕр хай цӕудзӕн экспортмӕ. Ныридӕгӕн нӕ компани цӕттӕ кӕны ӕмбӕлон гӕххӕттытӕ", — загъта Босыкты Владимир.
Згъубиры донӕн йӕ диссаджы хосгӕнӕн миниуджытӕ рагӕй фӕстӕмӕ сты зындгонд, ӕввахс хъӕуты цӕрджытӕ ацы суадонӕй канд сӕ дойны нӕ састой, фӕлӕ ма дзы пайда кодтой алыгъуызон низтӕ дзӕбӕхкӕныны хъуыддаджы дӕр.
"Цас фӕнды дзы ма баназай, уӕддӕр хос йедтӕмӕ зиан ницы хӕссы. Ӕгӕрыстӕмӕй хорз ӕндавы сывӕллӕтты организмыл дӕр. "Аландон" хорз у сӕкӕр, туджы бӕрзонд ӕлхъывдад ӕмӕ алыгъуызон хуылфы низтӕн хоскӕнынӕн. Ахӕм цаутӕ уыд, ӕмӕ сӕкӕры низ кӕмӕн уыд, уыдон ныууагътой сӕ инсулин ацы доны хӕсгӕнӕн ӕндӕвдады фӕстиуӕгӕн", — зӕгъы Владимир.
Цхинвалы цӕрӕг Тедеты Соня дӕр йӕ низтӕ фӕсырдта "Аландоны" фӕрцы ӕмӕ йӕ ныр нымайы ӕвдадзы хосыл.
"Мӕ туджы ӕлхъывдад иу бӕрзонд кӕй уыд, уымӕ гӕсгӕ ӕппынӕдзух нуӕзтон хостӕ. Фӕлӕ ацы дон мӕ къухты куы бафтыд, уӕдӕй фӕстӕмӕ мӕ ферох ис мӕ низ дӕр, ныууагътон мӕ хостӕ дӕр. Райсом раджы ӕмӕ хӕрды размӕ аназын суарӕй, стӕй ма иу фынӕйы размӕ раздӕр банызтон хос, еныр та йӕ раивтон иу агуывзӕ донӕй", — радзырдта Соня.
"Аландон" рацыд экспертизӕтӕ цалдӕр ран, Пятигорскы курортологийы зонад-иртасӕн институты курортон ресурсты хайады кусджыты та ирыстойнаг суар бафтыдта дисы.
"Уыдонмӕ экспертизӕмӕ хӕссынц дӕттӕ Цӕгат Кавказы алы къуымтӕй, фӕлӕ, хайады хистӕры ныхӕстӕм гӕсгӕ, ахӕм диссаджы доныл никуы ма фембӕлд. Минералон доны максималон фондз хосгӕнӕн компонентӕй "Аландоны" ис цыппар", — банысан кодта"Атей"-йы директор Босыкты Владимир.
Ныр компанийы фӕрцы "Аландоны" хосгӕнӕн ӕууӕлтӕ ӕввахс рӕстӕджы сӕхиуыл банкъардзысты канд Хуссар Иры цӕрджытӕ нӕ, фӕлӕ ма Мӕскуы, Санкт-Петербург ӕмӕ Дзӕуджыхъӕуы адӕм дӕр.
