06:15 21 ÆРТХЪИРÆНЫ МÆЙ
 2018
Комкоммӕ эфир
Московский ансамбль танца Алания

Мæскуыйаг кафты ансамбль "Алания" ратта концерт МИСИС-ы сценæйыл

Репортажтӕ
Чысыл дӕнцӕг
24 0 0

Ансамблы коллектив ма фæнд кæны ацы аз Цхинвалмæ концертимæ æрцæуын.

ЦХИНВАЛ, 23 май — Sputnik, Сабеты Аланæ. Мæскуыйаг кафты ансамбль "Алания" ратта æрвылазон концерт МИСИС-ы культурæйы хæдзары. Хуыцаубон изæры сценæмæ рахызтысты ансамблы 101 кафæджы. Сценæмæкæсджытæн базонгæ кодтой "Алания"-йы ранæуæггонд сконд. Программæ байгом кодта ирон традицион адæмон кафт "Хонгæ".

Ирон кафтытæй дарддæр ма артисттæ сæххæст кодтой уырыссаг, Кавказы адæмты кафтытæ, æгæрстæмæй ма аргентинæйаг фыййæуты кафт дæр. Ансамблы сывæллæтты студи дæр равдыста йæ арæхстдзинад æрыгон кафт сæххæстгæнгæйæ.

Концерты ма хайад райста кафт æмæ зарды ансамбль "Вольная станица". Артисттæ сæххæст кодтой зарджытæ, куыд уырыссаг, афтæ ирон æвзагыл. Цæгат Ирыстоны адæмон артист Челдыты Вадим та азарыд "Тохы зарӕг".

Московский ансамбль танца Алания
Мæскуыйаг кафты ансамбль "Алания"

"Алания"-йы аивадон къухдариуæггæнæг Мурацаты Тимуры ныхæстæм гæсгæ, коллектив хайад райсы сæдæгай мадзæлтты, фæлæ стыр солон концерт ратты аз иу хатт.

"Мах раттæм сæдæ иумæйаг концертæй фылдæр, фæлæ ахæм солон концерттæ та аз иу хатт. Абон немæ сценæмæ рахызт хъазахъхъыты коллектив, кæцыйы сфæлдыстад махæн у тынг æввахс. Уыдон тынг уарзынц Ирыстоны. Нымайæм æй репетицийыл. Ныфс мæ ис, сæ концерт сын кæй равдисдзыстæм Ирыстоны", — загъта Мурацаты Тимур.

Хуссар Ирыстоны минæвар УФ-йы Гасситы Знауыры ныхæстæм гæсгæ, минималон æхцайы фæрæзтӕм ӕнӕкӕсгӕйӕ ансамблы æмвæзад уæддæр у тынг бæрзонд.

"Ансамблы ахæм бæрзонд æмвæзад у "Алания"-йы къухдариуæггæнæг Мурацаты Тимуры сгуыхтдзинад. Коллективæн мæ зæрдæ зæгъы сфæлдыстадон æнтыстытæ, цæмæй бирæ рæстæг рухс кæной сæ табугæнджыты зæрдæтæ сæ аивадæй", — загъта минæвар.

Уый ма фехъусын кодта, уагъд кæй цæуы бадзырдтæ "Алания"-йы концерт Хуссар Ирыстоны ауадзыны фæдыл.

Кафты мæскуыйаг ансамбль "Алания" сырæзт 1994 азы. Коллективы сконды ис 150 адæймаджы. У бирæнымæц хорзæхтæй нысангонд, уыдон нымæцы — РХИ президенты Кадджын грамотæйæ, РЦИ-Аланийы президенты Кадджын грамотæйæ. "Аланияйы" аст артистæн лæвæрд æрцыд "РХИ сгуыхт артисты " ном, астæн та "РЦИ-Аланийы сгуыхт артисты" ном.

Сӕйраг темӕтӕ