Битеты Вадимы дыууӕ царды

© Sputnik / Алексей КовалевБитеты Вадимы дыууӕ царды
Битеты Вадимы дыууӕ царды - Sputnik Хуссар Ирыстон
Рафыссын
Иуӕй-иу адӕмӕн зын у сӕхи ӕрмӕст иу профессийы арӕны ӕвӕрын. Сӕ гоймагдзинады бирӕвӕрсыгдзинад сын фадат нӕ дӕтты ӕрмӕст иу хъуыддаг аразынӕн. Битеты Вадим кусы ӕфсӕддон комиссарады ӕмӕ кӕны ныв.

ЦХИНВАЛ, 15 июл — Sputnik, Босыкты Наталья. Ныв кӕнын Вадим райдыдта хӕрз чысылӕй, йӕ нана амыдта хахнывкæнын скъолайы. Сывӕллон уӕвгӕйӕ, уый цымыдис кодта, нана иу йемӕ куыд ӕрбахаста къарандастӕ ӕмӕ ахорӕнтӕ, цӕмӕй йӕ ахуыргӕнинӕгтӕн амыдтаид хӕдзары дӕр. Вадим рӕзтис ахӕм атмосферӕйы, уымӕ гӕсгӕ ныв кӕнын райдыдта чысыл лӕппуйӕ.

Курдиатмӕ ӕнӕкӕсгӕйӕ, ныв кӕнын ӕмӕ нывгӕнӕг суӕвын Вадимы нӕ фӕндыд. Хъӕууонхӕдзарадон уӕлдӕр ахуыргӕнӕндон каст фӕуыны фӕстӕ, Вадим йӕ профессийы кусын нӕ райдыдта, уымӕн та йӕ сӕйраг аххосӕгтӕй иу уыд Хуссар Иры хӕстон архӕйдтытӕ.

Нывгӕнӕг

Уӕззау дугмӕ ӕнӕкӕсгӕйӕ, уый ныв кодта хӕдбарӕй, кӕд ӕмӕ йӕм сӕрмагонд ахуырад нӕ уыд, уӕддӕр. Йӕ ныхӕстӕм гӕсгӕ, Хуссар Ирыстоны нывгӕнджыты цӕдисы сӕргълӕууӕг Цхуырбаты Тамерлан фӕдзӕхста Вадимы, цӕмӕй ныв кӕна профессионалон ӕгъдауӕй. Цавӕрдӕр рӕстӕджы фӕстӕ, уый аскъуыддзаг кодта аивадон ахуыргӕнӕндонмӕ ахуырмӕ бацӕуын.

Анна Гаглоева - Sputnik Хуссар Ирыстон
Гаглойты Аннӕйы дыууӕ царды

"Ныв кодтон хӕдхъомӕй, рӕстӕгӕй рӕстӕгмӕ, уӕды заманы мын нӕдӕр фадӕттӕ уыд, нӕдӕр рӕстӕг ахуырӕн. Цаврӕдӕр рӕстӕджы фӕстӕ, батальоны службӕ цӕугӕйӕ, бацыдтӕн ахуырмӕ Цхинвалы аивадон ахуыргӕнӕндонмӕ", — мысы Вадим.

2008 азы ахуыргӕнӕндон каст фӕуыны ӕмӕ диплом райсыны фӕстӕ, Вадимӕн нӕ бантыст сфӕлдыстадон нывӕзтытӕ скӕнын — уыцы аз августы Цхинвалы райдыдтой ӕххӕстмасштабон ӕфсӕддон архӕйдтытӕ.

Тызмӕг хӕст ӕмӕ дӕргъвӕтин сӕндидзӕн процессы фӕстӕ, райгуырӕн зӕххмӕ сабыргай сабырад куы ӕрӕздӕхт, уӕд ӕрыгон лӕппуйӕн фылдӕр рӕстӕг фӕзынд уарзон хъуыддаг кӕнынӕн.

Нывгӕнӕджы професси у сфӕлдыстадон куыст, кӕцы домы хорз фантази, удцырын ӕмӕ, кӕй зӕгъын ӕй хъӕуы, нывкӕнынады техникӕ. Аивадон архайды бирӕнымӕц здӕхтытӕм ӕнӕкӕсгӕйӕ, Вадим ӕрмӕст иу цавӕрдӕр стилыл хӕст нӕу, фӕлӕ ӕргомӕй дзуры, кӕй ныв кӕны, йӕ зӕрдӕмӕ цы цӕуы, уый. Йӕ ныхӕстӕм гӕсгӕ, тынг зæрдæмæхæссаг нӕу ӕмӕ зын зӕгъӕн у, цы йӕ удцырын кӕны.

"Сӕрмагондӕй ницы здӕхты кусын. Ныртӕккӕ ӕз фыссын саркастикон- стилизацигон здӕхты — нывты ӕвдыст сты ирон фольклоры хицæндзинӕдтӕ, ӕрмӕст чысыл ирониимӕ", — дзуры Битеты Вадим.

Вадим ныртӕккӕ хъомыл кӕны дыууӕ сывӕллон ӕмӕ кусы комиссарады. Ныв та арӕхдӕр фӕкӕны фӕскуыст ӕмӕ улӕфт бонты, чысыл, фӕлӕ æнцойуат ӕрмадзы Хуссар Ирыстоны нывгӕнджыты цӕдисы бӕстыхайы.

Уарзон Guns n'Roses композицитӕм хъусгӕйӕ уый ӕрӕвналы куыстмӕ, ивгъуыд бонтӕ мысгӕйӕ ӕмӕ нын ӕмбарын кӕны, йӕ куыст хуыздӕр цӕмӕн цӕуы — хорз музыкӕмӕ хъусгӕйӕ.

"Ӕвӕццӕгӕн, алы нвгӕнӕг дӕр бӕллы сӕрмагонд равдыстмӕ, фӕлӕ ахӕм куысты темптимӕ ӕз рӕхджы нӕ ныффысдзӕн 40 нывы, кӕд ӕмӕ мӕ царды уыд ахӕм рӕстӕг, къуырийы мидӕг иу дыгай нывтӕ куы фыстон, уӕддӕр. Мӕ нывтӕ уӕй нӕ кӕнын, фӕлӕ иу фӕсхӕст уӕззау азты ауӕй кодтон мӕ куыстытӕ ӕмӕ иу уыцы ӕхцатӕй дардтон мӕ бинонты", — мысы уый.

Ӕфсӕддон службӕгӕнӕг

2004 азы, радон фӕкарздӕр ӕфсӕддон уавӕры рӕстӕджы, Вадим йӕхи ныффысын кодта ӕхсӕзӕм батальонмӕ. Уыцы батальоны сконды уый службӕ кодта 2010 азы онг, уыд штабы сӕргълӕууӕг.

"Фӕстӕдӕр, хъахъхъӕнынады министрады кусджыты нымӕц цӕхгӕр куы фӕкъаддӕр кодтой, уӕд бацыдтӕн кусынмӕ паддзахадон телерадиокомпанимӕ режиссерӕй", — дзуры Вадим.

Ӕфсӕддон службӕмӕ баздӕхт иу азы фӕстӕ. 2011 азы Вадим бацыд службӕмӕ РХИ ӕфсӕддон комиссарадмӕ фыццаг хайады сӕргълӕууӕджы хистӕр æххуысгæнæгӕй. Йӕ бӕрны ис ӕрсидты организаци ӕмӕ ӕрыгон ӕрсиддонтимӕ куыст.

Джыгкайты Эльбрус - Sputnik Хуссар Ирыстон
Джыгкайты Эльбрусы дыууӕ царды

"Мӕ куысты рӕстӕджы ныхӕй-ныхмӕ бирӕ алыгъуызон адӕмыл фембӕлдтӕн, бирӕ цымыдисон уавӕрты бахаудтӕн. Ӕндӕр бӕстӕтӕм абаргӕйӕ, махмӕ ӕрсиддонтӕй бирӕтӕ сӕхӕдӕг ӕрбацӕуынц комиссарадмӕ, фӕсидӕнмӕ ӕнӕнхъӕлмӕкӕсгӕйӕ", — дарддӕр кӕны ныхас курдиатджын лӕппу.

Ӕрсидтмӕ хауӕг сӕйраг мадзӕлттӕ сты — медицинон басгӕрст, къамисы рабадт, ӕрыгон адӕмы ӕрсидты бынатмӕ арвыст, афтӕ ма ӕрсиддоны уӕвынад ӕфсӕддон комиссарады бӕстыхайы йӕ службӕ райдайӕны онг.

"2016 азы РХИ-ы уыд ӕрсиддонты рекордон нымӕц, раздӕры азтӕм абаргӕйӕ. Кӕйдӕрты дзы ссӕрибар кӕнынц йӕ ӕнӕниздзинады уавӕрмӕ гӕсгӕ, фӕлӕ се ‘хсӕн ис ахӕмтӕ, ӕфсӕддон службӕйӕ йӕхи чи аууон кӕны", — банысан кодта Вадим.

Цы у ахсджиагдӕр

Кӕцы професси у иууыл зынаргъдӕр ӕмӕ ӕввахсдӕр — ацы фарстӕн Вадим ӕнӕ дызӕрдыгӕй дзуапп дӕтты, зӕгъгӕ, нывкӕнынад. Йӕ ныхӕстӕм гӕсгӕ, нывтӕй райсгӕ фӕрӕзтӕй уаид цӕрӕн ӕмӕ бинонтӕ дарын, уый ӕнӕ хъуыдытӕ кӕнгӕйӕ йӕхи снывонд кодтаид аивадӕн.

Ног хабӕртты лентӕ
0