ЦХИНВАЛ, 31 мар — Sputnik, Плиты Фатимӕ. Хуссар Ирыстоны медицинон уагдӕтты астӕуккаг персонал рацӕудзысты сӕ квалификаци фӕбӕрзонддӕр кӕныны тыххӕй курсытӕ Цхинвалы Медицинон ахуыргæнæндоны. Курсытӕ байгом уыдзысты республикӕйы æнæниздзинады фадыджы размæцыды концепцийы фæлгæтты.
"Медицинон хотæ къордтæй рацæудзысты дыууæмæйон ахуыртæ. Ӕнæниздзинад хъахъхъæнынады министрады сараздзысты номхыгъдтæ ахæм хуызы, цæмæй медуагдæттæ персоналæй ма фӕцух уой", — радзырдта Sputnik ахуыргæнæндоны директоры хæдивæг Дзудцаты Альма.
Уый ма банысан кодта, концепцийы фӕлгӕтты къорд ивындзинæдтæ кӕй æнхъæлмæ кæсынц Медицинон ахуыргæнæндонӕн йӕхимӕ дæр. Ног ахуыры азы уал ам бакӕндзысты фельдшерон факультет, уымӕн ӕмӕ республикӕйы районты цы фельдшерон-акушерон пункттæ (ФАП) бакодтой, уыдон хъуагдзинад ӕййафынц кусджытӕй.
"ФАП-тæ ис æппæт дӕрддзæф хъæуты дæр, æдыппæтæй 47, уыдонæй 16 сты ног модулон. Мах нӕ фельдшерон факультеты цæттæ кæндзыстӕм медикты ФАП-тæн, кæцытæ хъæууон уавæрты ивдзысты дохтырты æмæ кæндзысты цӕрджытӕн фыццаг æххуыс", — бафтыдта йæ ныхæстæм Дзудцаты Альма.
Ахуыргӕнӕндоны директоры хӕдивӕг ма банысан кодта сӕ куысты къуыхцыдзинӕдтӕ дӕр, фыццаг — студентты чысыл нымӕц. Дзудцаты Альма радзырдта, скъолаты рауагъдонты фылдæр бӕрц сæ ных кӕй саразынц Уæрæсейы уæлдæр ахуыргæнæндæттæм, чи лимиты фæрцы, чи та йæхи тыхтæй. Ам чи баззайы, уыдоны фылдӕр хай та бацӕуы ХИПУмӕ.
"Ацы хъуыддаг мæгуырауӕй æндавы медахуыргæнæндоны студентты нымæцыл. Ӕнæуый та уагдоны ис нывыл уавæртæ ахуырæн — сæрмагонд кабинеттæ, æмдзæрæндон дӕрддзæф хъæутæй æрцæугæ студенттæн, спортивон зал, хæрæндон. Хуыздæр рауагъдон та æнæфæлварæнæй бацæуы Уæрæсейы уæлдæр ахуыргæнӕндӕттӕй искӕцымӕ медицинӕйы хаххыл", — бафтыдта йæ ныхæстæм уый.
Уый дӕнцӕгӕн ӕрхаста сӕ ахуырдзаутæй иу — Тыджыты Яникы, кӕцы дарддӕр ацыд Уӕрӕсейы æфсæддон-медицинон академимæ æмæ сæм хъуысынц йе ‘нтыстытæ.
"Нӕ рауагъдонтыл ма арæх фембæлӕм Цæгат Иры рынчындæтты дӕр. Бирӕтӕ сӕ дарддæр сахуыр кодтой æмæ абон сты Дзæуджыхъæуы хуыздæр дохтырты нымæцы, зӕгъӕм, кардиолог Гæджиты Константин, хирург Медойты Вадим æмæ æндæртæ", — ранымадта уый.
Карсанты Василийы номыл медицинон ахуыргæнæндонæн бындур æвæрд æрцыд 1931 азы, уæдæй нырмæ уагдон схъомыл кодта мингай медицинон хотæ, фельдшертæ. Цæгат æмæ Хуссар Ирыстоны номдзыд дохтыртæн сӕ фылдӕр сæ фæндаг медицинæмæ райдыдтой ацы ахуыргæнæндонæй.
Медахуыргæнæндоны Стыр Фыдыбæстӕйон хæсты рæстæджы сырæзт эвакогоспиталь. Уырдӕм ластой Стыр Фыдыбæстæйон хæсты быдыртæй уæззау цæфты ӕмӕ сӕ ирвæзын кодтой. Фæстæдæр хосгæнæн уагдоны кусджытӕн лӕвӕрд ӕрцыд СФХ архайджыты статус.
