ЦХИНВАЛ, 17 май — Sputnik, Плиты Фатимӕ. Хуссар Ирыстоны хъæутæм фӕстаг дыууӕ азы фæстæмæ ‘здæхын райдыдтой адæм, "уæрæседзаутæ" æмæ цхинвайлӕгтӕ горæты тыхстызмæлдæй сæхи ӕппарынц ӕрдзмӕ. Иууыл фылдӕр ног хӕдзӕрттӕ фӕзындысты Дзау ӕмӕ Цхинвалы районты. Sputnik бафæлвӕрдта рафæлгъауын, сӕрдыгон бонты улӕфынмӕ æви æдзухон цард кæнынмæ цæуынц хъæумæ абон?
Хуссар Иры хъæутæ кæй æдзæрæг кæнынц, уый сусæггаг никæмæн у. Иугай-дыгай раздæры нæргæ хъæутæ банцадысты цалдӕргай хæдзӕрттыл, науæд та сæ цъиуызмæлæг дæр нал ис — сӕ цӕрджытӕ хуыздӕр цардагур ныггуылф кодтой республикӕйы столицӕмӕ, науæд та фæсарæнтæм.
Ахӕм миграцийы аххосаг — цивилизацийæ иппæрддзинад, дон, рухс, фæндаг, скъола, куысты бынæтты цухдзинад. Фæлæ ныр районты æппæт ацы хæрзиуджыты арæзтад ссис приоритетон,
ӕмӕ сӕ абон æххæст цы хъӕутӕ сты, уыдонмæ дæр адæм фӕстӕмӕ здӕхынц зивӕггӕнгӕйӕ — ӕндӕр гӕнӕн сын куыннӕ вӕййы, уӕд.
Ныр фæстаг рæстæджы ацы тенденци чысыл фæсаст. Дзауы районы администрацийы Sputnik радзырдтой, фæстаг дыууæ азы районы ногæй кӕй æрцардысты 30 хæдзарæй фылдæр.
"32 бинонтæ фæстаг æзты скодтой хæдзæрттæ Дзауы районы, уыдонæй 10 æдзух цӕрынц ам, иннæтæ æрцæуынц ӕрмӕст сæрды. Ног цæрджытæй баххæст сты Хуыцъе, Едыс, Хъемулта, Цъон, Жрия æмæ æндæр хъæутæ. Дачӕтӕ чи сарæзта, уыдон дæр, уавæртæ куы фæхуыздæр уой, уæд фæнд кæнынц ам æрцæрын", — радзырдта районы сæргълæууæджы пресс-секретарь Тедеты Лиана.
Уӕлдай популярондӕр горӕттӕгты хсӕн сты столицӕмӕ хӕстӕг хъӕутӕ, ома Цхинвалы район. Ацы районы ӕввахс хъӕуты ма зӕххы гӕппӕл дӕр зынтӕй ссардзӕ ӕнӕхицауӕй.
Иууыл цæрæгджын хъæутыл районы нымад сты Тбет, Прис, Дменис, Цъунар, Дыгъуызтыхъæу æмæ æндæртæ.
"Тбет æмæ Присмæ тынг тырнынц адæм — ацы хъæутæ сты ӕнцонвадат, горæты къæсæрыл. Фæстаг æзты ам æрбынат кодтой бирæ бинонтæ. Ныр дӕр дзы бирӕтӕ сæ зæххы фадгуытыл æвæрынц хæдзары бындуртæ. Иннӕ хъӕутӕм дӕр здӕхынц адӕм, сӕ цӕрӕнуӕттӕ хæсты хъыгдард кæмæн æрцыдысты, уыдонæн хицауад баххуыс кодта саразынмæ, фæлæ дзы ис ахæмтæ дæр, кæцытæ сæхи тыхтæй аразынц хæдзӕрттæ", — загъта Sputnik Цхинвалы районы администрацийы сæргълæууæг Плиты Алан.
Ацы хабарыл тынг ӕхсызгонӕй ӕмбӕлынц куыд районты къухдариуӕгад, афтӕ цӕрджытӕ дӕр — уыдон цин кӕнынц ног сыхӕгтыл, фæлæ, хъыгагӕн, горӕттӕгтӕ фылдæр бæрцæй амайынц хъӕуты сæрдыгон цæрæнуӕттæ.
"Тынг уарзын ӕрдз, хъӕууон атмосферӕ, сыгъдӕг уӕлдӕф. Ӕрӕджы Цхинвалы районы хъӕутӕй иуы райстон зæххы фадыг, сӕмбонд ӕй кодтон, ныр дзы хъавын саразын хъæдын мӕнгагъуыст. Улæфт бонты-иу ме ʻмгæрттимæ нæхи ирхæфсдзыстæм ам. Фæстæдæр, фæрæзтæ мӕ куыд амоной, афтæ дзы самайдзæн хæдзар. Уырдæм цæрынмæ алидзыны фæнд нырма нæ кæнын, фæлæ зæрырдæм мæ хъуыдытæ чизоны фæивой", — дзуры Цхинвалы цӕрӕг Ӕхсар.
Уавӕр чысыл мӕгуыраудӕр у Знауыр ӕмӕ Ленингоры районты —дӕрддзӕф сты республикӕйы столицӕйӕ, фӕлӕ уырдӕм дӕр сӕ фыдӕлты зӕххытӕм цадӕггай здӕхынц адӕм Цхинвалӕй ӕмӕ Уӕрӕсейы алы ӕмӕ алы горӕттӕй. Районты разамонджытӕ дӕр ныфс ӕвӕрынц ног куысты бынӕттӕй, фермерон ӕмӕ хъӕууонхӕдзарадон амалиуӕгадтӕ саразынӕй ӕмӕ кӕд, Хуыцауы фӕндӕй, уый суаид ног стимул хъӕутӕм здӕхынӕн.
