ЦХИНВАЛ, 18 июл — Sputnik. Фæлтæрд ирон футболон тренер Черчесты Станислав райста æнхъарæн Уæрæсейы æмбырдгонды сæргъ слæууыны фæдыл, хъусын кæны газет "Р-Спорт".
Уæрæсейы футболы цæдис хъуамæ фехъусын кæна бæстæйы æмбырдгонды сæйраг тренеры ном мæйы кæронмæ.
"Уæрæсейы националон æмбырдгонды тренеры бынатмæ сæйраг кандидат у Черчесты Станислав. 52 аздзыд ирон специалист æрæджы райста æнхъарæн æмбырдгонды сæргъ слæууыны фæдыл. Ныридæгæн цæуы бадзырдон процесс", — дзырдæуы хъусинаджы.
Черчесты Станиславæй дарддæр Уæрæсейы националон æмбырдгонды сæйраг тренеры бынатмæ кандидатты шорт-листмæ бацыдысты Александр Бородюк æмæ Сергей Семак, стæй ма дыууæ фæсарæйнаг тренеры.
Уæрæсейы футболы цæдисы вице-президент Никита Симонян амæй размæ фехъусын кодта, зæгъгæ, националон æмбырдгонды сæргъ слæудзæн уæрæсейаг специалист.
Черчесты Станислав 2015/16 сезоны тренировкæ кодта Польшæйы "Легия"-йы, командӕимӕ рамбылдта бӕстӕйы чемпионат æмæ Кубок.
Ӕрæджы ма ирон специалист райста æнхъарæн австрийы чемпион "Ред Булл"-ы сæргъ слæууыны фæдыл, фæлæ Уæрæсейы æмбырдгонды бынат куы ссæрибар ис, уæдæй фæстæмæ Черчесты Станислав клубимæ бадзырдон процесс æруæрдта.