ЦХИНВАЛ, 6 авг — Sputnik. Уæрæсейы уæгъдибар хъæбысхæстæй 2018 азы чемпионаты расгуыхт 8 ирон богалы, сыгъзæрин майданты хицау баисты Сидахъты Зауыр æмæ Цæкулаты Батырбег, аннæтæ ссисты призертæ, комкоммæ трансляци уагъта УФ-йы уæгъдибар хъæбысхæсты федерацийы сайт.
Олимпиаг чемпион Рæмонаты Сослан, кæцыйы хуыдтой 70 кг уæзы лидер, финалмæ нæ ахызт.
Ирон богал Цæкулаты Батырбег 92 кг уæзы рамбылдта Кæсæг-Балхъары хъæбысхæцæг Анзор Уришевы æмæ ссис Уæрæсейы чемпион. 74 кг уæзы та "сыгъзæрин"-ыл тох цыд дыууæ ирон богал Цæболты Хетæг æмæ Сидахъты Зауыры ʻхсæн. Фæлтæрд спортсмен, дунейы чемпион Цæболты Хетæджы рамбылта йе ʻвзонг æмзæххон Сидахъты Зауыр.
86 æмæ 97 кг уæзты æвзист майдантæ райстой Байцаты Владислав æмæ Найфонты Артур. Фыццагæн нæ бантыст олимпиаг чемпион Абдулрашид Садулаевы басæттын, дыккаг фæхæрд ис финалы Даурен Куруглиевæн. Бронзæйон майдантæ райстой Уалыты Владислав, Байаты Дауыт æмæ Хуыбежты Къахбер.
Ерыстæ цыдысты 3-5 августы Одинцовойы. Цæгат Ирыстоны спорты министрады бæрæггæнæнтæм гæсгæ æмткæй чемпионаты архайдтой 45 ирон богал.
