ЦХИНВАЛ, 11 ноя — Sputnik. Президент Тыбылты Леонид арвыста арфæйы тел Никарагуайы президент Даниель Ортегайæн йæ 70 азы юбилейы цытæн, фехъусын кодта Sputnik паддзахады сæргълæууæджы пресс-секретарь Гана Яновская.
"Фæлтæрд политик, куырыхон къухдариуæггæнæг, йæ бæстæйы æцæг патриот — ды æвдисыс хъæбатыр адæймаджы цæвиттон, кæцыйы фундаменталон принциптæ сты сабырдзинад бахъахъхъæнын, диалог фидар кæнын æмæ æндæр бæстæты хæдбардзинадад æмæ æнæбайсгæ барты банымад", — загъта Тыбылты Леонид.
Уый банысан кодта, Хуссар Ирыстоны сæ хъус кӕй дарынц "Никарагуайы райрæзты цæстуынгæ æнтыстытæм", кæцытæ къухты бафтыдысты бæстæйы хицауады политикæйы фæрцы.
Тыбылты Леонид фидарæй загъта, Хуссар Ирыстон æмæ Никарагуайы æхсæн хæларадон æмæ хъарм ахастытæ кæй кæндзысты фидарæй фидардæр.
"Дæ райгуырæн боны цытæн дын, цытджын команданте Ортега, мæ зæрдæ зæгъы фидар æнæниздзинад, амонд æмæ стыр æнтыстытæ дæ архайды Республикæ Никарагуайы адæмы хæрзиуæгæн", — дзырдæуы арфæйы телы.
Никарагуа банымадта Хуссар Ирыстоны хæдбардзинад 2008 азы сентябры, уый ссис фыццаг бæстæ Уæрæсейы Федерацийы фæстæ, кæцы сарæзта ахæм къахдзæф. Дыууæ азы фæстæ бæстæты æхсæн фидар æрцыдысты дипломатон ахастытæ, 2011 азы июлы Никарагуайы байгом Хуссар Ирыстоны минæварад.
