ЦХИНВАЛ, 16 дек — Sputnik. Цæгат Ирыстон Донецкаг æмæ Луганскаг адæмон республикæтæм арвыста 2,5 тоннæйæ фылдæр кондитерон продукци æмæ ногазон лæвæрттæ. Донбассмæ гуманитарон æххуыс ласынц Цæгат Ирыстоны Уæлвæткон уавæрты министрады сæйраг управленийы транспортыл, фехъусын кодтой управленийы пресс-службæйы.
Ведомствойы куыд банысан кодтой, афтæмæй гуманитарон уаргъ ЛАР æмæ ДАР-мæ æрвыст æрцыд РЦИ-Аланийы сæргълæууæджы æмæ хицауады барамындмæ гæсгæ.
"Фæстаг дыууæ азы мидæг республикæ æххуыс кæны Хъырымæн, Донецкæн, афтæ ма Цæгат Ирыстоны территорийыл уæвæг лигъдæттæн. Республикæйы районтæ æмæ коммерцион организациты фæрцы махæн бантыст Украинæйы скæсæйнаг территорийы чысыл цæрджытæн бирæ ногазон лæвæрттæ æрæмбырд кæнын. Ныфс нæ ис, сæ бæрæгбон сын кæй сарæзтам хъæлдзæгдæр æмæ адджындæр", — загъта мадзалы организатортæй иу, Макоты Бэлæ.
Гуманитарон æххуыс фыццаг фæхæццæ кодтой УФ УУМ-ы Хуссар регионалон центры ирвæзынгæнæн центрмæ, уый фæстæ та уæлвæткон ведомствойы колоннæйы сконды фæхæццæ уыдзæн снысангонд бынатмæ.
