ЦХИНВАЛ, 22 июн — Sputnik. Хуссар Ирыстоны ӕртыццæджы æхсæвы ссыгътой сæдæгай цырæгътæ акци "Фыдохы цырагъ"-ы рæстæджы, кæцы нывонд уыд Стыр Фыдыбæстæйон хæсты райдианы бонæн.
Фæмардуæвджыты рухс ном ссарынмæ æмæ удыгас хъайтартæн скад кæнынмæ Цхинвалы сæйраг фæзуатмæ рацыдысты президент Тыбылты Леонид, хицауад æмæ парламенты уæнгтæ, республикæйы сæдæгай цæрджытæ.
Стыр Фыдыбæстæйон хæсты фæмардуæвæг хæстонты рухс ном ссардтой иу уысм æдзæмæй алæугæйæ. Хæдтæхæгыл Мæскуыйæ Дзæуджыхъæумæ, уый фæстæ та Цхинвалмæ фæхæццæ кодтой цырагъ, кæцы ссыгътой Æбæрæг солдаты ингæны цур Мæскуыйы.
Хуссарирыстойнаг паддзахадон университеты ахургæнæг Тедеты Залинæ банысан кодта, рæстæджы цыдимæ адæмæй æппындæр кæй нæ ферох уыцы фыдохы бон, хæст куы бабырста сæ цардмæ.
"Алы бинонтæ дæр бавзæрстой хъизæмæрттæ æмæ рис, хæсты быдырты фесæфтой сæ хиуæттæ æмæ хæстæджыты. Уыдонæн сæвæрдтой цыртытæ Ирыстоны, Уæрæсейы, Белоруссийы, Болгарийы æмæ бирæ æндæр бынæтты. Сæ ингæнтæм сын зилынц алы адæмыхаттыты минæвæрттæ. Хъæздыг у Ирыстоны зæххыл цæрæг адæмы хъæбатырдзинады истори", — загъта уый.
Фыццаг хатт акци "Фыдохы цырагъ" уагъд æрцыд 2009 азы. 21 июны Стыр Фыдыбæстæйон хæсты фæмардуæвджыты рухс ном арынæн æрвылаз дæр цырæгътæ ссудзынц милуанмæ æввахс адæм æппæт дунейы.
Хуссар Ирыстоны акци "Фыдохы цырагъ"-ы организатор ссис æфсæддон-патриотикон акци "Æнæмæлгæ полк" цæттæ кæныны фæдыл штаб.
Стыр Фыдыбæстæйон хæсты рæстæджы Сырх Æфсады рæнхъыты тох кодтой 22 мин хæстоны уæды Хуссар Ирыстоны автономон областæй. Хæсты фронтты хæцыд Хуссар Ирыстоны алы фæндзæм цæрæг. Се ‘рдæг (11 минæй фылдæр) нал рыздæхт фæстæмæ. Авд мин хæстоны ныры онг нымад цæуынц æбæрæгæй фесæфæгтыл.
