ЦХИНВАЛ, 12 июл — Sputnik, Плиты Фатимæ. Хуссар Ирыстоны паддзахадон университеты дæлбар уæвæг студентон клуб "Аполлон" сфидар кодта йæ сӕрдыгон балцыты нывæзт — ацы мæйты клубы уӕнгтӕ сараздзысты æртæ балц республикӕйы иууыл бӕрзонддӕр хæхтæм.
Ныр цыппор азæй фылдæр студентон клуб "Аполлон" йæхимæ æлвасы Хуссар Иры уæлдæр ахуыргæнӕндоны студентты — Ирыстоны æрдз, культурæ, истори æмæ æмткæй райгуырæн бæстæ удуæлдай уарзт чи кæны, уыдон азӕй азмӕ баххæст кæнынц клубы рæнхъытæ.
Ацы клубы чи æрфидар вæййы, уыдон дзы никуы уал фæиппæрд вæййынц. Сæдæгай адæм Хуссар Иры, афтӕ ма дард фæсарæнтæм царды гуылфæнтæ кæй ахастой, уыдон се ‘ппæт дæр сæрæстырæй сæхи хонынц "аполлононтӕ".
Клубы куысты сæйраг здæхӕнтæй иу у Хуссар Иры алæмæттаг кæмттыл æрзилын, райгуырæн бæстæйы бæрзонддæр хæхтæ басæттын.
"Нæ нывæзтмæ гæсгæ, ацы аз хъуамæ саразæм æртæ балцы. Июлы 15-æм бон "Аполлон"-ы фæлтæрд уæнгтæ абалц кæндзысты Дзауы районы Джермухы хохмæ. Фыццаг балц ахæсдзæн æртæ боны бæрц, уый уыдзæн альпинистон балц", — радзырдта Sputnik клубы уæнг Къацты Олеся.
Дыккаг балц аполлононтæн уыдзæн Урс Туалты комы историон бынæттæм, бӕлццӕттӕ ӕрзилдзысты Едыс, Гæлуатæ, Хъæдласæны хохрæбынтыл, фендзысты зæронд хæххон хæдзæрттæ æмæ лæгæттæ. Сæрдыгон балцтæ та клубы уӕнгтӕ балхынцъ кæндзысты Зикъарайы хохмæ схызтӕй.
Ӕвӕццӕгӕн республикӕйы зынгӕ адӕмӕй стӕмтӕ разындзӕн ахӕмтӕ, кӕцытӕ сӕ царды хицӕн ӕмӕ хицӕн рӕстӕджыты баст нӕ уыдысты Аполлонимӕ.
Клуб йӕ алыварс ӕрӕмбырд кодта хицӕн ӕмӕ хицӕн кары ӕмӕ професситы минӕвӕртты. Уыдон 44 азы дæргъы басастой Ирыстоны бæрзонддæр хæхтæ, сæ фæндаг ракодтой рæсугъддæр кæмттыл, федтой фыдæлты мæсгуытæ, зӕппӕдзтӕ æмæ лæгæттæ.
Ныр дӕр та фæлтæрд аполлононтæ тырнынц сæ над къахфæндæгтыл ноджы иу хатт æрзилын, æвæлтæрдтæ та сæхи цæттæ кæныц фыццаг балцытæм.
"Аполлон"-ы президент, фæсарæйнаг æвзæгты факультеты студенткӕ Козаты Зӕлинӕйы ныхæстæм гæсгæ, ахуыры азы райдайæны иубонон балцытæ æнхъæлмæ кæсынц клубы ног уӕнгтӕм — ХИПУ фыццаг курсыты студенттæм, кæцытæ сæхи сбастой "Аполлон"-имæ.
"Фыццагкурсонты акæндзысты историон бынæттæм, базонгæ сӕ кӕндзысты сæ фыдæлты царды уагимæ", — загъта уый.
Афтӕ ма аполлононтӕ æрвылаз дæр республикæйы зынгæ бонтæн снывонд кæнынц альпинистон балцытæ. Хуссар Ирыстоны хæдбардзинад расидыны æмæ Республикæйы бонтæм уыдон схизынц Ирыстоны уæлвонгдæр хæхтæм æмæ дзы æрсадзынц Иры тырыса. Клубы уæнгтæ басастой Халацайы, Зиккарайы хæхтæ æмæ Бурсамдзелы хохы бæрзæндтæ.
Паддзахадон университеты бæстыхайы арæзтады рæстæгмæ кæд уæлдæр ахуыргæнӕндон кусы къуындæг уавæрты æмдзæрæндоны агъуысты, уæддæр дзы "Аполлон"-æн ссардтой хицӕн хатæн, цæмæй клубы куыст ма фæкъуыхцы уа.
"Ӕмдзæрæндоны нын ис хицæн хатæн, цыран ӕрвыл къуырисæр дӕр, куыд 44 азы размæ, афтӕ аразæм не ʻмбырдтæ, сфæлдыстадон изæртæ, бацæттæ кæнӕм цымыдисон раныхастæ æмæ фембæлдтæ, афтæ ма æруынаффæ кæнæм нæ дарддæры нывæзтыл. Иннӕ аз нысан кæнӕм нӕ клубы 45 азы юбилей æмæ уæдмæ дæр ссараздзыстæм балцытæ æмæ æндæр мадзæлттæ", — банысан кодта Къацты Олеся.
Студентон клуб "Аполлонæн" бындур æвæрд æрцыд 1972 азы 1 марты. Клуб саразыны хъуыды раразмæ кодта Хуссар Ирыстоны педагогон институты ахуыргæнæг Саулохты Тамара ӕмӕ бирӕ ӕзты уыд йӕ ӕнӕивгӕ къухдариуӕггӕнӕг. Фыццаг рады клубы уӕнгты иу кодта музыкæ, кинонывтæ æмæ фембæлдтæ, фæстæдæр сæ архайд рауæрæхдæр ис ӕмӕ райдыдтой аразын балцытæ историон бынӕттæм æмæ хæхты бӕрзӕндӕм схызтытӕ.
