ЦХИНВАЛ, 18 июл — Sputnik, Хъотайты Мария. Цӕгат Кавказы хъуыддӕгты фӕдыл министр Лев Кузнецов критикӕйы бын фӕкодта Цхинвалы арӕзт цӕуӕг объекттӕй иуӕй иуты арӕзтадон куыстыты темптӕ. Аннӕ объектты аразджыты куыстӕй та баззад райгондӕй.
Цхинвалы дыууӕбонон визитимӕ уӕвгӕйӕ Кузнецов республикӕйы премьер-министр Хъуылымбегты Доментиимӕ, арӕзтады министр Зӕгъойты Николайимӕ ӕмӕ Цхинвалы мэр Ӕлборты Аланимӕ азылдысты арӕзтадон объекттыл, кӕцытӕ бахауыдысты ацы азы Инвестпрограммӕмӕ.
Алы объектыл дӕр министр цымыдис кодта аразджыты проблемӕтӕ ӕмӕ фӕндиӕгтимӕ. Нардуатон организациты минӕвӕрттӕ дзуапп кодтой, финанстӕ ӕмӕ арӕзтадон ӕрмӕджытимӕ хъуагдзинад ныртӕккӕ кӕй нӕ ӕййафынц.
Кузнецов бабӕрӕг кодта, Хъайтарты уынгыл арӕзтцӕуӕг бирӕуӕладзыгон цӕрӕн корпус, цы ран нардуатисджыты ныхӕстӕм гӕсгӕ, "аразджытӕ графикӕй фӕстейӕ зайынц 40 боны, арӕзтадон ӕрмӕджытӕй рӕстӕгыл ифтонг кӕй не рцыдысты, уый аххосагӕн".
Лев Владимиры фырт йе ‘ххуысгӕнджытӕн бахӕс кодта аразджыты ныхӕстӕ банысан кӕнын, афтӕ ма объекты къамтӕ сисын, цӕмӕй сӕ абарой кӕрӕдзиимӕ йӕ радон визиты рӕстӕджы сентябры.
"Коллегӕтӕ, курӕг уӕ дӕн, цӕмӕй сӕ ныффыссат, цӕмӕй сӕ иннӕ хатт абарӕм, цы ныфсытӕ нын ӕвӕрдтат ӕмӕ цы сарӕзтат. Ныр уал бӕрӕгӕй зыны, объекты арӕзтад кӕй цӕуы лӕмӕгъӕй", — загъта Кузнецов.
Дзулфыцӕн комбинаты ног объекты арӕзтад фенгӕйӕ дӕ, Кузнецов равдыста æнæразыдзинад йӕ арӕзтады темптӕй. Уый банхъардта, цӕмӕй комбинаты хистӕр ныффысса йӕ бынатӕй ацӕуыны тыххӕй куырдиат, кӕд ӕмӕ объект экспуатацимӕ лӕвӕрд ма ӕрцӕуа ацы аз октябры. Комбинаты директоры ныхӕстӕм гӕсгӕ, арӕзтадыл кусы 28 кусӕджы ӕмӕ "ӕмӕ графикӕй фӕстейӕ зайынц мӕййӕ къаддӕр. Кузнецовы хъуыдымӕ гӕсгӕ, йӕ фӕстаг визитӕй фӕстӕмӕ объекты арӕзтады ницы прогресс ис.
"Ды мын дзурыс, алцыдӕр хорз у, зӕгъгӕ. Ды нын фидарӕй дзырдтай, октябры нӕ кӕй ацаходдзынӕ дзулӕй. Ацы объект сымахӕн арӕзт цӕуы. Хицауад уын хицӕн кӕны ӕхцайы фӕрӕзтӕ, адӕмы хъӕуы дзул ӕмӕ Ды хӕссыс бӕрн ацы объектӕн. Мӕйгӕйтты фӕстейӕ зайут нывӕзтӕй ӕмӕ уый ӕмрӕстӕджы дзурут, кӕй ратдзыстут рӕстӕгыл эксплуатацимӕ объект. Афтӕмӕй та 1 октябрмӕ баззад ӕрмӕстдӕн дыууӕ мӕйы", — смӕсты министр.
Универститеты ног бӕстыхайы арӕзтады та министр баййӕфта бынтондӕр ӕндӕр ныв ӕмӕ загъта бузныг аразджытӕн сӕ активон куысты тыххӕй.
"Ам бӕрӕгӕй зыны, куыд архайут. Мӕ раздӕры визиты рӕстӕджы ацы бынаты уыд ӕрмӕстдӕр котлован, ныр та арӕзт ӕрцыд дыууӕ уӕладзыгы", — загъта министр.
Уӕрӕсейаг министр ма басгӕрста ног операцион-хирургион комплексы, гуырӕн хӕдзары ӕмӕ сывӕллӕтты бирӕпрофилон рынчындоны арӕзтады темптӕ.
Кузнецов куыд банысан кодта, афтӕмӕй ныридӕгӕн агурын хъӕуы сывӕллӕтты рынчындоны сӕйраг дохтыр, уымӕн ӕмӕ персонал хуыздӕр зоны, цы фадӕттӕ хъӕуы аразын ӕнцонвадат куысты тыххӕй.
Цӕгат Кавказы хъуыддӕгты министр ма басгӕрста, аразджытӕн бантысдзӕн ӕви нӕ ноябрмӕ падзахадон драмтеатры бӕстыхай эксплуатацимӕ раттын.
Нардуатисджыты ныхӕстӕм гӕсгӕ, ныридӕгӕн райстой 400 милуан сомы аргъ ифтонггарз, хъуамӕ ма райсой механизмтӕ Францӕй. Театры арӕзтады иумӕйаг аргъ у 1 миллиард ӕмӕ 270 милуан сомы.
Театры холлы министры хъусдард йӕхимӕ аздӕхта уый, ӕмӕ арӕзтадон куыстыты кӕроны датӕйы фӕстаг цифтӕ хафт кӕй уыд.
"Уыйй та цы у — куысты кӕрон 201…? Нӕ йӕ ӕмбарын. Ныффыссут арӕзтадон куыстыты кӕроны датӕ, кӕйытӕ нывӕзтмӕ гӕсгӕ кӕронмӕ хъуамӕ бахӕццӕ уой 2016 азы сентябры", — ӕрдомдта Кузнецов.
Объекттыл азилыны фӕстӕ арӕзтадмӕ хауӕг фарстытыл уынаффӕтӕ адарддӕр сты хицауады хӕдзары цы рабадтуагъд цыд, уым.
