ЦХИНВАЛ, 27 мар — Sputnik. Цхинвайлаг спортсменкæ Дудайты Донна ссис Цæгат-Кавказаг федералон зылды фыццагады уæлахиздзау киокусин-кан каратейæ, фехъусын кодта Sputnik чызджы тренер Созаты Владимир.
Ерыстæ уагъд цыдысты Ставрополы. Хайад ма дзы райстой ноджы дыууæ спортсменкӕйы — Гаглойты Диана æмæ Тадтаты Софья.
"Дудайты Донна архайдта 45 кг онг уæзы категорийы 12-13 азты кары сывæллæтты æхсæн. Фембæлдтæ иууылдæр æнтыстджынæй ауадзгæйæ, уый финалы фембæлд бынæттон спортсменкæимæ. Уæлахиз Доннайы къухты бафтыд æмгъуыдæй раздæр", — загъта тренер.
Йæ ныхæстæм гæсгæ, 50 кг онг уæзы категорийы ныхмæлæууæг нæ разынд Гаглойты Дианайæн, кæцыйы къухты дæр бафтыд æмгъуыдæй раздæр уæлахиз арæхстджын архæйдтыты фæрцы.
55 кг онг уæзы категорийы та æвзист майданы хицау ссис Тадтаты Софья.
"Софья тынг хорз равдыста йæхи финалагъоммæ ныхмæлæудты, фæлæ, хъыгагæн, кæронбæттæны фембылд Дагестаны минæварæн", — загъта Созаты Владимир.
Тренер райгондæй баззад цæгатирыстойнаг спортсменкæты архæйдтытæй турниры. Уый ма загъта, ныр та сæхи кæй райдайдзысты цӕттӕ кӕнын Хуссар федералон зылды фыццагадмæ, кæцы ацæудзæн майы, афтæ ма æфсæддон аивæдты æрвылазон фæсивæдон фестиваль"Сабыр Кавказ"-мæ. Ацы ерыстæ та ацæудзысты июны Дзæуджыхъæуы.
Хуссарирыстойнаг спортсменкæтæ ЦКФЗ-ы фыццагады архайдтой цæгатирыстойнаг командæйы сконды.