ЦХИНВАЛ, 7 май — Sputnik. Хуссар Ирыстоны ӕфсӕддонтӕ фыццаг хатт хайад райсдзысты Стыр Фыдыбӕстӕйон хӕсты Уӕлахизы 73 азы цытӕн парады, кӕцы уагъд цӕудзӕнис Донецкы Адӕмон республикӕйы столицӕйы 9 майы, фехъусын кодта "Sputnik" Хъахъхъӕнынады министрады пресс-службӕйы сӕргълӕууӕг Чехойты Инга.
Йӕ ныхӕстӕм гӕсгӕ, хуссарирыстойнаг ӕфсӕддонты къорд исы хайад парады репетициты Донецкы Ленины фӕзуатыл.
"Уый ӕмрӕстӕджы та Цхинвалы ӕфсӕддон парады репетициты хайад исынц Донецкы сӕрмагонд ӕфсӕддон скъолайы курсанттӕ. Донецкы хъахъхъӕнынады министрады минӕвӕрттӕ дӕр фыццаг хатт райсдзысты хайад Уӕлахизы цытӕн парады Цхинвалы", — банысан кодта Чехойты Инга.
Уый ма ноджы банысан кодта, ацы хъуыддагыл кӕй бадзырдтой Донецкы январы, Хуссар Ирыстоны президент Бибылты Анатолий ӕмӕ Донецкы Адӕмон республикӕйы сӕргълӕууӕг Александр Захарченкойы фембӕлды рӕстӕджы.
Ленины фӕзуатыл рацӕудзысты республикӕйы ӕфсады парадон къордтӕ, Уӕлвӕткон уавӕрты Министрады, Мидхъуыдтӕгты министрады, сӕрмагонд нысаниуӕджы полчы, Донецкы сӕрмагонд ӕфсӕддон скъолайы курсантты ӕмӕ ӕфсӕддон Лицейы ахуыргӕнинӕгты къордтӕ дӕр.
