ЦХИНВАЛ, 24 июл – Sputnik. Цӕгат Ирыстоны Ногиры хъӕуы 49-аздзыд цӕрӕг йӕ хӕдзары сарӕзта наркопритон. Фӕткхалӕн хъуыддаджы тыххӕй полицимӕ фехъусын кодтой нӕлгоймаджы сыхӕгтӕ, хъусын кӕны 15 регион республикӕйы МХМ пресс-службӕйы информацийыл ӕнцойгӕнгӕйӕ.
Фӕткхалӕджы ныхмӕ ма раздӕр дӕр уыд конд уголовон хъуыддаг.
Барадхъахъхъӕнджытӕ бацыдысты нӕлгоймаджы хӕдзармӕ. Уым ма йӕ хицауӕй дарддӕр полицӕйагтӕ баййӕфтой ноджы Дзӕуджыхъӕуы ӕртӕ цӕрӕджы. Фӕстӕдӕр куыд рабӕрӕг ис, афтӕмӕй уыдоны иууылдӕр цалдӕр хатты ӕркодтой уголовон бӕрнмӕ УФ УК алыгъуызон статьятӕм гӕсгӕ.
"Цӕрӕнуат басгарыны рӕстӕджы барадхъахъхъӕнджытӕ ссардтой медицинон шприцтӕ ӕмӕ ӕбӕрӕг буарадтӕ, кӕцытӕ ист ӕрцыдысты. Куыд рабӕрӕг, афтӕмӕй фыдгӕнӕг арӕх кодта йӕ зонгӕты хӕдзармӕ наркотикон буарадтӕй спайда кӕнынмӕ", - дзырдӕуы хъусинаджы.
Цауы фӕдыл бакондӕуыд уголовон хъуыддаг. Нӕлгоймагмӕ ӕнхъӕлмӕ кӕсы цыппар азы онг ахӕст.
