10:11 19 ХУРХÆТÆНЫ МÆЙ
 2019
Комкоммӕ эфир
  • EUR72.23
  • USD64.34
Цхинвалы ацыд Гугкаты Эвелинæйы фотоальбомы презентаци

Сценæйы ус-паддзах: Цхинвалы ацыд Гугкаты Эвелинæйы фотоальбомы презентаци

© Пресс-служба президента РЮО.
Хуссар Ирыстоны
Чысыл дӕнцӕг
56 0 0

Рауагъды 50 фарсыл бацыд актрисæйы сфæлдыстадон фæндаг, арфæ кæнынмæ æрбацæуджытæ Эвелинæйæн снывонд кодтой зарджытæ æмæ æмдзæвгæтæ, дзырдтой йæ диссаджы фæлгонцтыл æмæ йæ хуыдтой ногæй рахизын сценæмæ

ЦХИНВАЛ, 7 июн – Sputnik, Плиты Фатимæ. Хуссар Ирыстоны адӕмон артисткӕ Гугкаты Эвелинæйы юбилейон фотоальбомы презентаци ацыд Паддзахадон драмон театры Цхинвалы. Рауагъды 50 фарсыл бацыд актрисæйы сфæлдыстадон фæндаг. Мадзалмæ æрбацыдысты йæ коллегæтæ, æндæр сфæлдыстадон кусыджытæ æмæ президент Бибылты Анатолий, кæцыйы финасон æххуысæй рацыд рауагъд.

Ус-паддзах - ахæм ном æрфидар ис Гугкаты Эвелинæйыл йæ сæххæстгонд фæлгонцтæй иуæй. Актриса 55 азы дæргъы сценæйыл рацард сæдæ фæлгонцы бæрц, уымæн саргъ кодтой адæмон артисткæйы номæй.

Презентацийы рæстæджы юбиляры адресыл хъуыстысты хъарм ныхæстæ, йæ коллегатæ йæм хатыдысты ногæй рахизын сценæмæ, лæвар ын кодтой дидинтæ æмæ чысыл лæвæрттæ, снывонд ын кодтой æмдзæвгæтæ æмæ зарджытæ.

Райдайæны æрæмбырдуæвджытæн равдыстой Гугкаты Эвелинæйы хайдистæй спектакльтæ "Расыггæнджытæ", "Саухъус æлдар" æмæ "Ӕфхæрдты Хасана"-йæ скъуыддзæгтæ. Беппиты Изольдæйы ист кадрты "Ус-паддзахæй" дарддæр ферттывта Гæбæраты Дауыт дæр.

"Сценæйы цы бирæнымæц фæлгæнцтæ сæххæст кодта, уыдонæй хицæн кæны ус-паддзахы роль, уымæн схуыдтам фотоальбом дæр афтæ. Ис дзы Плиты Гацыры уац ирон æвзагыл æмæ мæхæдæг та ныммыхуыр кодтон йæ мысинæгтæ. Бирæ нæм ис ноджы аккаг адæм æмæ нæ ныфс ис, ноджы кæй фæзындзæн ахæм альбомтæ", - загъта рауагъды редактор Зæгъойты Рада.

Республикӕйы президент Бибылты Анатолий банысан кодта, адæмон артисткӕ Гугкаты Эвелинæ йӕ ус-паддзахы фæлгонц кæй рахаста цардмæ дæр.

"Ус-паддзахы фæлгонцæй Эвелинæ нæма рахызт. Йæ ныхасы дæр ма бахъахъхъæдта уыцы уæздандзинад, интеллигенттæ иууылдæр сты ахæм", - загъта президент.

Горæты культурæйы хайады хистæр Тасойты Игорь актрисæйæн снывонд кодта зарæг, поэтесса Чехойты Оля - æмдзæвгæ. Юбиляр бузныджы ныхæстæ загъта æрымбырдуæвджытæн æмæ банысан кодта, аивадмæ ныры хуызæн хъусдард кæй никуы уыд.

"Ныры хуызæн хъусдард хицауадæй никуы уыд театрмæ, уый тыххæй хæлæг кæнын кæстæр фæлтæрмæ – æрмæстдæр ма уæ хъæуы кусын", - загъта Гугкаты Эвелинæ.

Презентация фотоальбома к юбилею Эвелины Гугкаевой
© Пресс-служба президента РЮО.
Цхинвалы ацыд Гугкаты Эвелинæйы фотоальбом презентаци

Мадзалы кæрон актрисæ уазджытæн схæлар кодта йæ фæндиæгтимæ фотоальбомы фæйнæ экземпляры.

Хуссар Ирыстоны адӕмон артисткӕ Гугкаты Эвелинæ 55 азӕй фылдӕр архайдта Хетӕгкаты Къостайы номыл Паддзахадон драмон театры сценӕйыл ӕмӕ сӕххӕст кодта сӕдӕ фӕлгонцӕй фылдӕр. Иууыл сӕйрагдӕр ӕмӕ ахсджиагдӕр, йӕхи хъуыдымӕ гӕсгӕ, уыд спектакль "Леди Макбет"-ы фӕлгонц.

Сӕйраг темӕтӕ