ЦХИНВАЛ, 3 сен - Sputnik. Хуссар Ирыстоны алкӕцы скъолайы дӕр ис проблемӕтӕ зынгсирвӕзтты ныхмӕ сигнализациимӕ, фехъусын кодта Sputnik Уӕлвӕткон уавӕрты министрады (УУМ) сӕргълӕууӕг Цоциты Азӕмӕт.
"Скъолаты дӕр, кӕцыты ис сигнализаци, уый иттӕг хорз нӕ кусы. Нӕй дзы схемӕтӕ ӕмӕ документтӕ, кӕцытӕм гӕсгӕ йӕ нӕ специалист басгардзӕн. Схемӕтӕ хъуамӕ уой сметон документацийы, цӕмӕй зонӕм, цы ран цӕуынц зынгсирвӕзтты ныхмӕ хъахъхъӕнынады хӕххытӕ", - бахахх кодта министр.
Министр бафтыдта, 30 августмӕ кӕй басгӕрстой республикӕйы ахуыргӕнӕндӕттӕ иууылдӕр.
Цоциты Азӕмӕт ма банысан кодта, горӕты скъолаты кӕй ис арт ахуыссын кӕныны фыццаг фӕрӕзтӕ, фӕлӕ кӕцыдӕр ахуыргӕнӕндӕтты уыдон хъӕуы сног кӕнын.
"Республикӕйы алкӕцы ахуыргӕнӕндоны дӕр хъӕуы сног кӕнын арт ахуыссын кӕныны фыццаг фӕрӕзтӕ. Хицауад ныридӕгӕн рахицӕн кодта фӕрӕзтӕ сӕ балхӕнынӕн. Тагъд рӕстӕджы сӕ балхӕндзыстӕм, ӕмӕ скъолатӕ иууылдӕр уыдзысты ифтонг арт ахуыссын кӕныны фыццаг фӕрӕзтӕй", - загъта министр.
Уымӕй дарддӕр ма министр бахахх кота, ӕндӕр ахуыргӕнӕндӕттӕ, се хсӕн сабидӕттӕ, ифтонг сты сигнализацийӕ.
Афтӕ ма министр фехъусын кодта, республикӕйы кӕй ис зынгсирвӕзтты ныхмӕ ӕдасдзинады системӕты специалистты цухдзинад.
