ЦХИНВАЛ, 13 сен — Sputnik, Плиты Фатимæ. Хуссар Ирыстон æмæ Абхазы паддзахадон драмон театртæ бадзырдтой æмгуыстадыл. Сразыдзинады фæлгæтты дыууæ республикæты театртæ фæуазæг уыдзысты кæрæдзимæ гастрольты, фехъусын кодта Sputnik ПДТ аивадон къухдариуæггæнæг Дзудцаты Тамерлан.
Абхазы национ театры генералон директор Нодар Чамба æмæ Хуссар Ирыстоны паддзахадон драмон театры аивадон къухдариуæггæнæг Дзудцаты Тамерлан фембæлдысты Сухумы.
"Абхазы театр нырма Хуссар Ирыстоны никуы уыд. Бадзырдтам, цæмæй нæм æрцæуой гастрольты. Нæхи труппæ кæд Абхазы уыд, уæддæр-иу ахастам иу спектакль, ныр та нæ фæнды ирон театралон аивад равдисын æххæстæй", - загъта Дзудцаты Тамерлан.
Уый ма радзырдта, Абхазы театр кæй фæуазæг уызæн Цхинвалмæ æрбалæугæ азы.
"Ӕфсымæрон республикæйы труппæ æрхæсдзæн сæ репертуары аккагдæр спектакльтæ, кæцытæ расгуыхтысты фестивальты. Уый фæстæ та сæм ныццæудзыстæм нæхæдæг. Апрелы ма мах æнхъæлмæ кæсæм Ульяновскы "Небольшой театр"-мæ дæр", - бафтыдта уый.
