ЦХИНВАЛ, 27 мар – Sputnik, Козаты Диана. Хуссар Ирыстоны хицауад майрӕмбоны рабадтыл ӕрдзурдзӕн коронавирусон инфекци COVID-19-ы ныхмӕ мадзӕлттӕ райсыныл. Рабадт ацӕудзӕн ӕнӕ журналисттӕй.
Сӕйраг санитарон дохтыр Коцты Марина цыппӕрӕмы фехъусын кодта, коронавирусы апарахат ма ‘руадзыны нысанӕн республикӕйы кӕй сӕхгӕндзысты кӕцыдӕр ӕхсӕнадон бынӕттӕ.
Йӕ ныхӕстӕм гӕсгӕ, карантиныл сӕхгӕндзысты кафетӕ, ресторантӕ, базарадон центртӕ ӕмӕ спортивон залтӕ.
"Хицауад сбӕрӕг кӕндзӕн, кӕцы организацитӕ ӕмӕ объекттӕ сӕхгӕндзысты. Махмӕ нӕй коронавирусӕй фӕрынчынуӕвджытӕ, фӕлӕ профилактикон мадзӕлттӕ хъӕуы уадзын", - загъта Коцты Марина ПТРК "Ир"-ы эфиры.
Уый бахахх кодта, мадзӕлттӕ кӕй уадзынц, цӕмӕй адӕм кӕрӕдзиимӕ къаддӕр контакт кӕной.
Цыппӕрӕмы хицауад аскъуыддзаг кодта адарддӕр кӕнын карантин Хуссар Ирыстоны ахуырадон уагдӕтты ноджы дыууӕ къуыримӕ.
Карантинон мадзӕлттӕ фӕтыхджындӕр кӕныны фӕдыл ӕрдзырдтой республикӕйы закондӕттӕг органы дӕр. Уым банхъардтой расидын дӕс боны дӕргъы иумӕйаг карантин.
Амӕйразмӕ Хуссар Ирыстоны тобæ сæвæрдтой фæсарæйнаг æмбæстæгтæн республикæйы территоримæ æрбахизыныл, арæнæвæрд нæ хауы æрмæстдæр уæрæсейæгтæм, афтӕ ма сӕхгӕдтой уадзӕн пункттӕ Гуырдзыстонимӕ паддзахадон арӕныл. Уымӕй дарддӕр тобӕ сӕвӕрдтой культурон ӕмӕ спортивон мадзӕлттӕ ауадзыныл.
Ӕнӕниздзинад хъахъхъӕнынады ӕппӕтдунейон организаци 11 марты фехъусын кодта, ног коронавирус COVID-19 кӕй у пандеми.
Дунейы вирусӕй ныридӕгӕн фӕрынчын сты 526 мин адӕймаджы 188 бӕстӕйы, сӕ фылдӕр хайӕн схос кодтой, 23 мин адӕймагӕй фылдӕр фӕмард сты.
