ЦХИНВАЛ, 5 май — Sputnik, Плиты Фатимæ. Хуссар Ирыстоны паддзахадон радиостанц "Ир"-ы аив кӕсыны конкурсы фӕбӕрӕг сты дзырдарӕхстдӕр сывӕллӕттӕ. Аив кӕсыны быцӕуы равзӕрстой дыууӕ уӕлахиздзауы.
Конкурс радио "Ир-FM" расидт апрелы, архайыны фадат дзы уыд мӕлгъӕвзаг ныфсхаст сабитӕн ӕртӕ азы карӕй уӕлӕмӕ. Конкурсон куыстытӕ равдыстой Цӕгат Ир ӕмӕ Казахстанӕй дӕр. "Ир-FM"- ы конкурс цыд социалон хызӕгты, ивгъуыд къуырийы кӕрон радио ӕрурӕдта хъӕлӕсӕппӕрст.
Конкурсы фӕлгӕтты рабӕрӕг сты дыууӕ уӕлахиздзауы, уыдонӕй иуы равзӕрста жюри, аннӕйы сбӕлвырд кодтой социалон хызӕгты пайдагӕнджыты ахастмӕ гӕсгӕ - хынцыд цыдысты лайктӕ, бакасттӕ, комментаритӕ.
"Фыццаг бынат кӕсджыты хъуыдымӕ гӕсгӕ лӕвӕрд ӕрцыд Битеты Асланӕн, кӕцы тынг хорз радзырдта Хетӕгкаты Къостайы ӕмдзӕвгӕ "Додой". Лӕварӕн уый исы чиныг "Гыццыл принц" ӕмӕ Пӕррӕстаты Ланайы открыткӕты ӕмбырдгонд", - ныффыстой сӕ фарсыл Instagram-ы "Ир-FM".
Хъусинаджы ма нысан ӕрцыд, жюри та фыццаг бынат кӕй радта Хуыгаты Евайӕн, кӕцы конкурсмӕ бамбал ис фӕстаг бон.
"Уымӕн лӕвар цӕуы иу мӕйы ахуыр аивӕдты лицей "Фарн"-ы", - дзырдӕуы хъусинаджы.
Уымӕй дарддӕр ма къорд сывӕллоны та ссисты конкурсы призертӕ. Сӕ нымӕцы Ӕлборты Эрика, Габаты Анна, Джиоты Дима, Битеты Лана, Габуты Алина, Вова Цхе, Джиоты Диана, Гӕбӕраты Мария ӕмӕ ӕндӕртӕ.
Уагӕвӕрдмӕ гӕсгӕ, сабитӕ кастысты сӕ уарзон ӕмдзӕвгӕтӕ, цы ӕвзагыл сын ӕнцондӕр уыд, ууыл. Видеойы гӕнӕн уӕвгӕ хронометраж уыд иу минутӕ.
