ЦХИНВАЛ, 16 июл - Sputnik, Хъуылымбегты Зӕлинӕ. Хуссар Ирыстоны Уӕллаг Ерманы хъӕуы сӕрмӕ сцалцӕг кодтой кувӕндон Сырхы дзуар. Цалцӕггӕнӕн куыстыты организатор ӕмӕ инициатор уыд Цхинвалы цӕрӕг Хубиаты Альберт.
Йӕ ныхӕстӕм гӕсгӕ, Сырхы дзуары сӕйраг кувӕндон ис Дзимыры комы. Кувӕндоны къултӕ райдыдтой пырх кӕнын, фӕлӕ, уымӕ ӕнӕкӕсгӕйӕ, адӕм дарддӕр цӕуынц уырдӕм кувынмӕ. Уырдыгӕй цӕрджытӕ рахастой цалдӕр дуры, кӕцытӕй спайда кодтой Сырх Дзуары арӕзтады Уӕллаг Ерманы сӕрмӕ.
Кувӕндоны агъуыстыл сӕвӕрдтой ариаг драконты, кӕцыты сарӕзта Калаты Нариман. Драконтӕ хъахъхъӕнынц сыгъдӕг бынат хӕйрӕджытӕй.
"Драконтӕ арӕзт сты сыфнӕзыйӕ. Ацы хихджын бӕласы нӕ халы дон", - загъта Калаты Нариман.
Йӕ ныхӕстӕм гӕсгӕ, ахӕм драконты гӕнӕн ис фенын Рекомы кувӕндоны дӕр.
Инициатортӕ куыд нысан кӕнынц, афтӕмӕй цалцӕггӕнӕн куыстыты рӕстӕджы нӕ пайда кодтой уӕлӕмхасӕн ӕрмӕджытӕй.
