ЦХИНВАЛ, 3 авг – Sputnik, Козаты Диана. Цхинвалы фӕстаг хӕзбон загътой Хуссар Ирыстоны Сырх чиныджы автор Къӕбулты Зауырӕн.
Зындгонд ахуыргонд дендролог ахицӕн йӕ цардӕй 82 азы кары. Уый амард Цӕгат Ирыстоны, уырдыгӕй йын йӕ мӕрдон буар ӕрластой Хуссар Ирыстонмӕ. Уӕрӕсеимӕ арӕны уылты ахизыныл тобӕйы тыххӕй Къӕбулты Зауыры хиуӕттӕ не рцыдысты.
Къӕбулты Зауырӕн фӕстаг хӕрзбон зӕгъынмӕ ӕрбацыд республикӕйы къухдариуӕгад президент Бибылты Анатолийы сӕргълӕудӕй, йӕ коллегӕтӕ Хуссар Ирыстоны университет ӕмӕ зонадон-иртасӕн институтӕй.
"Мах фӕстаг хӕрзбон дзурӕм нӕ зынаргъ адӕймагӕн. Иууылдӕр зонынц йӕ куыст "Хуссар Ирыстоны Сырх чиныджы" тыххӕй, фӕлӕ уымӕн ис ноджы бирӕ зонадон куыстытӕ, кӕцытӕ зындгонд сты ӕрмӕст Хуссар Ирыстон ӕмӕ Уӕрӕсейы нӕ, фӕлӕ ма фӕсарӕнты дӕр. Куы-иу базыдта иу рагон бӕласы тыххӕй дӕр, уӕд-иу мӕ ракуырдта ацӕуын йемӕ, цӕмӕй бӕлас бахӕссой реестрмӕ ӕмӕ ма фесӕфа", - радзырдта Зонадон-иртасӕн институты директор Гаглойты Роберт.
Гаглойты Роберт банысан кодта, ахуыргонды кӕй фӕндыд саразын тобӕгонд зонӕтӕ Тлигом ӕмӕ Ручъы комы, ӕмӕ баныфсӕвӕрдта, йӕ фӕдонтӕ кӕй сӕххӕст кӕндзысты Къӕбулты Зауыры фӕндтӕ.
ХИПУ ректор Тедеты Вадим загъта, Къӕбулты Зауыры кӕй зыдта куыд хорз коллегӕ, сыхаг ӕмӕ ахуыргӕнӕг.
"Уый йӕ фӕстӕ ныууагъта стыр фӕд. Стыр куыст бакодта Сырх чиныг саразыны фӕдыл, ӕркодта бирӕ ахуыргондты Уӕрӕсейӕ", - загъта ректор.
Къӕбулты Зауыры бавӕрдтой Националон пантеоны ахуыргонд ӕмӕ академик Джусойты Нафийы цур.
Биологон зонӕдты кандидат Къӕбулты Зауыр фӕстаг ӕзты куыста Хуссары Ирыстоны паддзахадон университеты, уыд Хуссар Ирыстоны паддзахадон ӕрдзӕвӕрӕны директоры хӕдивӕг. 2018 азы президент ахуыргонды схорзӕхджын кодта республикӕйӕ уӕлдӕр хорзӕх - "Кады орден"-ӕй.
