ЦХИНВАЛ, 31 авг - Sputnik. Хуссар Ирыстоны танкистты командӕ, кӕцыйы сконды сты Гуыбаты Таймураз, Сабанты Андрей ӕмӕ Къулухты Солтан, бацахста ӕртыккаг бынат "Танкон биатлон" конкурсы "Сӕрмагонд дугъты" этапыл дыккаг дивизионы, хъусын кӕны АрМИ-2020-ы пресс-службӕ.
"Дыккаг дивизионы уӕлахиздзау ссис ӕртыккаг таджикаг экипаж, кӕцы рамбылдта фӕстаг этапыл 28,13 минуты фӕстиуӕгимӕ. Дыккаг бынатыл ацыд Таджикистаны командӕйы дыккаг экипаж 29.22 минуты фӕстиуӕгимӕ. Ӕртыккаг бынат бацахста Хуссар Ирыстоны командӕ 31.49 минуты фӕстиуӕгимӕ", - дзырдӕуы хъусинаджы.
"Сӕрмагонд дугъты" этапыл цы 45 танкон экипажы хайад райстой, уыдонӕн хатдзӕгтӕ скодтой Ӕхсӕнадӕмон ӕфсӕддон хъӕзтыты тӕрхондоны къамисы рабадтыл ивгъуыд хуыцаубоны.
Фыццаг дивизионы уӕлахиздзау ссис уӕрӕсейаг командӕйы фыццаг экипаж, сӕ фӕстиуӕг уыд 17,47 минуты. Дыккаг бынатыл дӕр ацыд уӕрӕсейаг экипаж, уыдон равдыстой 19.37 минуты фӕстиуӕг. Ӕртыккаг бынат та бацахста Китайы экипаж 19.44 минуты фӕстиуӕгимӕ.
