ЦХИНВАЛ, 19 окт — Sputnik, Плиты Фатимӕ. Хуссар Ирыстоны паддзахадон университеты бакодтой карантин. Уӕлдӕр ахуырадон уагдон ӕрурӕдта йӕ куыст дыккӕгӕм ноябры онг.
Уагдоны пресс-службӕйы Sputnik фехъусын кодтой, ахӕм уынаффӕ кӕй рахаста ректорат.
"Уавӕр хынцгӕйӕ, ректорат аскъуыддзаг кодта уагдоны бакӕнын карантин 19 октябрӕй дыккӕгӕм ноябрьмӕ, цӕмӕй адӕмы бахизой сезонон грипп ӕмӕ коронавирусӕй", - загътой уагдоны пресс-службӕйы.
Уый размӕ республикӕйы сӕйраг дохтыр Коцты Марина ӕрсидт цӕрджытӕм, цӕмӕй сӕхи хизой бирӕ адӕмы ӕмбырды бынӕттӕм цӕуынӕй, ӕххӕст кӕной санитарон службӕты рекомендацитӕ ӕмӕ рынчыны симптомтӕ куы рахатой, уӕд сӕхи ахибар кӕной ӕмӕ фӕдзурой дохтырмӕ хӕдзармӕ.
Хуссар Ирыстоны Уӕрӕсеимӕ арӕны баконды фӕстӕ коронавирус сбӕрӕг кодтой 206 адӕймагӕн, эпидемийы райдайӕнӕй та 296 ӕмбӕстагӕн.
