ЦХИНВАЛ, 20 окт - Sputnik, Плиты Фатимӕ. Хуссар Ирыстоны столицӕйы 21 октябрӕй фӕнд кӕнынц ӕруромын ноджы ӕртӕ сабидоны куыст. Горӕты администрацийы ахуырады хайады Sputnik фехъусын кодтой, зӕгъгӕ, мадзӕлттӕ баст сты, банысангонд скъолайы агъоммӕ уагдӕтты хистӕртӕн коронавирус кӕй сбӕлвырд кодтой, уыимӕ.
"Фӕндзӕм сабидоны кӕд нырмӕ уыд ӕхгӕд ӕрмӕст иу къорд, уӕд ӕй гриппы апарахаты аххосӕй ныр фӕнд кӕнӕм сӕхгӕнын карантиныл. Дыккӕгӕм ӕмӕ ӕхсӕзӕм сабидӕтты хистӕртӕн та сбӕлвырд кодтой коронавирус",- загъта Цхинвалы ахуырады хайады хистӕр Сиукъаты Ольга.
Уый ма банысан кодта, уымӕй размӕ Цхинвалы ӕнгӕс аххосӕгтӕм гӕсгӕ кӕй ӕрурӕдтой фыццӕгӕм стабидоны куыст.
Хуссар Ирыстоны столицӕйы амӕйразмӕ сӕхгӕдтой карантиныл цалдӕр скъолайы, 21 октябрӕй та фӕнд кӕнынц бакӕнын карантин алкӕцы ахуырадон уагдоны дӕр.
