ЦХИНВАЛ, 29 окт — Sputnik, Плиты Фатимӕ. Хуссар Ирыстоны Дзауы районӕй коронавирусӕй фондз уӕззау рынчыны рарвыстой Цхинвалы республикон бирӕпрофилон медицинон центрмӕ, аннӕ фондз хос кӕнынц хӕдзӕртты, фехъусын кодта Sputnik районы рынчындоны сӕйраг дохтыр Гасситы Константин.
Республикӕйы фӕстаг бонты карздӕр кӕны коронавирусы апарахаты фӕдыл уавӕр. Хуссар Ирыстоны медиктӕн ӕххуысмӕ дыццӕджы 'рцыд Уӕрӕсейы ӕфсӕддон-быдырон госпиталь.
"Уӕззау рынчынтӕ ӕрвитӕм Цхинвалмӕ, фондз адӕймаджы Дзауы районӕй уым хос кӕнынц. Ноджы ма фондз адӕймаджы сты хӕдзӕртты, фæлæ медикты хъусдарды бын. Кӕд дохтыр аскъуыддзаг кӕна ӕмӕ уыдон хъӕуы уӕлӕмхас хъусдард, уӕд сӕ рвитдзыстæм ӕфсӕддон-быдырон госпитальмӕ, кӕцы рцыд Цхинвалмӕ", - загъта уый.
Гасситы Константин ма банысан кодта, ныридӕгӕн рынчынтӕ кӕй сты иу дохтыры хъусдарды бын, аннӕ медиктӕ сты карджын.
"Куысты уӕлхъус ма ис иу терапевт, радгӕсон дохтыр Тедеты Мадина. Уый дӕтты консультацитӕ телефонӕй, бахъуыды рӕстӕджы та бацӕуы бынатмӕ. Аннӕ дохтыртӕ сты 70 азы карӕй уӕлӕмӕ ӕмӕ сӕхицӕн дӕр у ацы низ тӕссаг",- бафтыдта медик.
Уый ма банысан кодта, районы рынчындоны медперсонал ифтонг кӕй у хъахъхъӕнӕн костюмтӕй.
