ЦХИНВАЛ, 14 дек - Sputnik. Уӕрӕсейы хицауад фӕстауӕрцон фондӕй рахицӕн кодта 79,7 милуан сомы Хуссар Ирыстонӕн коронавирусы ныхмӕ тох кӕнынӕн, дзырдӕуы уӕрӕсейаг хицауады уынаффӕйы, кӕцы ныммыхуыр кодтой къуырисӕры барадон информацийы порталы.
Документы дзырдӕуы, ӕхцатӕ кӕй рахицӕн кодтой коронавирусӕй рынчынтӕн хостӕ балхӕнынӕн, рынчындӕтты "сырх зонӕтӕ" туаггуырӕй сифтонг кӕнынӕн ӕмӕ коронавирусы фӕдыл лабораторитӕн ӕнӕмӕнгхъӕугӕ ифтонггарз балхӕнынӕн, афтӕ ма медиктӕ ӕмӕ ӕндӕр кусджытӕн фиддонтӕ бафидынӕн.
Хуссар Ирыстоны пандемийы рӕстӕджы сбӕрӕг кодтой дыууӕ минӕй фылдӕр рынчыны.
Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.
