Хуссар Иры уадзын райдайдзысты лимонад Згъубиры донӕй

© Sputnik / Наталья АйриянЗгъубир
Згъубир - Sputnik Хуссар Ирыстон, 1920, 18.02.2021
Рафыссын
Суаруадзæн фирмæйы къухдариуæггæнæг куыд банысан кодта, афтæмæй ӕввахс рӕстӕджы бынæттон магазинты фæзындзæн лимонады дыууæ хуызы – "Аландон-Тархун" æмæ "Аландон-Кӕрдо"

ЦХИНВАЛ, 18 фев – Sputnik, Дриаты Лейла. Хуссарирыстойнаг донуадзæн компани "Алтей" Згъубиры суары донæй уадзын райдайдзæн лимонад, фехъусын кодта Sputnik йӕ сæргълæууæг Босыкты Владимир.

Ацы суаруадзæн завод Хуссар Ирыстоны фæзынд авд азы размæ. Ныртæккæ уадзы минералон дон "Аландон", кæцы ист цæуы Згъубирмæ хæстæг суадонæй. Лимонад рауадзыны хъуыды заводы къухдариуæгадмæ рагæй уыд, фæлæ инфекцион низ COVID-19 апарахаты аххосæй фæкъуылымпы сты.

Босыкты Владимир куыд банысан кодта, афтæмæй ӕввахс рӕстӕджы бынæттон магазинты фæзындзæн лимонады дыууæ хуызы – "Аландон-Тархун" æмæ "Аландон-Кӕрдо".

"Лимонадуадзæн сæрмагонд ифтонгæдтæ ныридæгæн сты заводы территорийыл. Уыдон монтажгонд æрцæудзысты æмæ уæд 0,5 литруат авгæй мигæнæнты сахаты мидæг уагъд цæудзæн 1500 иуæджы. Ныртæккæ заводы ис 10 кусæджы. Лимонад уадзын куы райдайæм, уæд ма кусынмæ райсдзыстæм æхсæз адæймаджы", - радзырдта фирмӕйы директор.

Уый банысан кодта, Уæрæсе æмæ ма Сомихстонимæ цы бадзырдтæ сарæзтой пандемийы агъоммæ, уыдон сæ тыхы кӕй баззадысты ӕмӕ куыддæр завод лимонад уадзын райдайа, афтæ продукци экспорт цæудзæн уырдæм дæр.

Джиоты Тамара ӕмӕ Къуылыхты Земфира - Sputnik Хуссар Ирыстон, 1920, 23.06.2020
Слӕууыдтӕн мӕ къӕхтыл: куыд хос кӕнынц Хуссар Иры донӕй артрозӕн

"Цы ног агрегат æлхæд æрцыд, уый фæрцы ныр завод сахаты мидæг уадздзæн 3000 пластикон 1,5 литруат авджы. Уымæ гæсгæ мах архайæм бадзырдтæ аразын Беларуси, Казахстан æмæ Киргизиимæ дæр. Уый тыххæй нæ къухы ис сертификаттæ, кæцытӕ бар дæттынц ахæм бадзырдтæ аразынæн", - зæгъы Босыкты Владимир.

Компанийы агъуыст ныртæккæ ис Цхинвалы БАМ-ы районы. Заводмæ дон ласынц Згъубирæй. Бынаты йæм бафтауынц газ æмæ йæ стæй 1,5 литруат пластикон мигæнæнты уадзынц. Уæй йæ кæнынц заводæн йæхицæй дæр æмæ ма сын цы магазинтимæ ис бадзырд арæзт, уыдонӕй дæр.

"Бадзырдтæ арæзт нын ис Уӕрӕсейы бирæ горæттимæ дæр. Донæн йæ хосгæнæн æууæлтæ зындгонд сты Мæскуы, Санкт-Петербург æмæ ма Сомихстоны дæр. Пятигорскы курортологийы зонад-иртасæн институт цы хатдзæгтæ сарæзта Згъубиры донæн, уымæ гæсгæ йе ‘ууæлтæй æввахс у Кисловодскы донмæ", - банысан кодта амалиуæггæнæг.

Босыкты Владимир ма куыд зæгъы, афтæмæй дон цæуы Кавказы хохрагъæй Згъубирмæ. Никæцы дон æм схæццæ вæййы. Специалисттæ сарæзтой ахæм хатдзæг, зæгъгæ, ацы дон ахъаз у артроз, диабет æмæ цармы низтæн.

Ног хабӕртты лентӕ
0