ЦХИНВАЛ, 9 мар - Sputnik, Хъуылымбегты Зӕлинӕ. Хуссарирыстойнаг хореографион ансамбль "Арт" ссис Ӕхсӕнадӕмон онлайн-фестиваль Folk International 2021-ы фыццаг къӕпхӕны лауреат, радзырдта Sputnik ансамблы къухдариуӕггӕнӕг Дзабиты Екатерина.
Фестиваль уагъд цыд Италийы. Хуссарирыстойнаг минӕвӕрттӕ жюрийы размӕ рахастой дыууӕ кафты - Хонгӕ ӕмӕ Сиргӕ. Хайадисджыты хъуыд сисын кафтыты видео ӕмӕ йӕ арвитын мадзалы организатортӕм.
Кафта ансамблы къухдариуӕггӕнӕджы ныхӕстӕм гӕсгӕ, видеороликтӕ ма хайад райстой номинаци "Адӕмы цӕстӕнгас"-ы дӕр.
"Видеотӕ сӕвӕрдтой YouTube, цы ран цыд хъӕлӕскӕнынад. Преми дӕттой ахӕм коллективӕн, кӕцы райстаид фылдӕр бакасттӕ ӕмӕ лайктӕ", - радзырдта Дзабиты Екатерина.
Фестивалы хатдзӕгтӕ раргом кодтой ивгъуыд улӕфт бонты комкоммӕ эфиры.
"Тынг тыхстыстӕм ӕмӕ сцин кодтам, куы фехъуыстам, зӕгъгӕ, нӕ дыууӕ кафты дӕр ссисты фыццаг къӕпхӕны лауреаттӕ", - банысан кодта уый.
Мадзалы фӕстиуджытӕм гӕсгӕ йӕ уӕлахиздзаутӕ райстой 50-процентон аргъцух ӕндӕр фестивальмӕ, кӕцы ацӕудзӕн Испанийы.
Хореографион ансамбль "Арт" ма рамбылдта номинаци "Адӕмы цӕстӕнгас"-ы дӕр ӕмӕ уый хыгъд райста фадат ӕнӕаргъӕй архайын радон фестиваль Folk International-ы, кӕцы ацӕудзӕн июны кӕрӕтты.
