ЦХИНВАЛ, 6 фев — Sputnik, Плиты Фатимæ. Хуссарирыстойнаг бастдзинады компани "Остелеком" расидт хъазт-викторина "Дзур иронау". Мадæлон æвзаджы дæсныйæн организатор æрцæттæ кодта лæвар — iPhone 8, фехъусын кодта компанийы æхсæнадимæ бастдзинады фæдыл специалист Кокойты Ека.
Акци райдыдта къуырисæры, 5 февралы æмæ ахæсдзæн 20 боны.
"Ирон æвзаг популяризаци кæныны нысанæн арæзт цæуы хъазт. Алкæмæн дæр фадат ис сæ тыхтæ сфæлварын ирон æвзагæй æмæ рамбулын iPhone 8. Викторинайы архайыны фæнд чи кæны, уыдон хъæуы сæ мобилон телефонты сисын *849# æмæ дзуаппытæ раттын фарстытæн. Иу раст дзуаппæн лæвæрд цæуы 10 баллы, телефон фæуыдзæн, иууыл фылдæр баллтæ чи æрæмбырд кæна, уый", — банысан кодта Кокойты Ека.
Уый ма банысан кодта, цæттæ фарстытæ кæй фенын кодтой ирон филологтæн рæдыдтытæ аиуварс кæныны нысанæн.