ЦХИНВАЛ, 13 фев — Sputnik, Козаты Диана. Гуырдзыстоны æмбæстаг Бестауты Геннадийы æрцахстой Цхинвалы дыууæ мæйы æмгъуыдмæ Хуссар Ирыстоны паддзахадон арæны режим фехалыны тыххæй, фехъусын кодтой Паддзахадон æдасдзинады комитеты.
50-аздзыд нæлгоймаджы ивгъуыд къуыри цыппæрæм хатт æрцахстой арæнхъахъхъæнджытæ Цхинвалы районы Хелцуайы хъæуы цур паддзахадон арæны режим фехалыны тыххæй.
"Бестауты Геннадий у Гуры районы Зардианткарийы хъæуы цæрæг. Ӕрцахсты фæстæ дыккаг бон ПӔК бакодта уголовон хъуыддаг арæныл æнæзакононæй рахызты фæдыл", — загътой ПӔК-ы.
Ведомствæйы сбæлвырд кодтой, Бестауты Геннадийы ма кæй æрцахстой 2017 азы августы, сентябры æмæ октябры аналогон фæткхæлдты тыххæй æмæ баййæфта административон æмæ уголовон æфхæрд.
Уый фæдыл, 9 февралы Цхинвалы районон тæрхондоны скъуыддзагмæ гæсгæ Бестауты Геннадий æрцыд ахст развæлгъау басгæрсты рæстæгмæ, ома дыууæ мæйы æмгъуыдмæ.