ЦХИНВАЛ, 20 мар — Sputnik, Уалыты Диана. Цхинвалы ацыд Сырх чиныджы презентаци, кæцыйы рæстæджы президент Бибылты Анатолий раарфæ кодта йæ автор Къæбулты Зауырæн æмæ бузныг загъта, чи йыл бафыдæбон кодта, æппæт уыдонæн сæ гуырахстджын куысты тыххæй.
"Зын у афæлгæсын, цас тых, хъару бахардз кодтат ацы диссаджы куыстыл. Дынджыр бузынг уын! Мæн уырны, чиныг кæй фæпайда уыдзæн флора æмæ фаунæ кæй цымыдис кæны, уыдонæн", — загъта уый.
Чиныджы автор Къæбулты Зауыр бузныг загъта, йе ʻххуысы къух æм чи фæдардта, уыдонæн æмæ радзырдта, куыд цыд чиныгыл куыст.
"2010 азы мæм фæзынд Хуссар Иры Сырх чиныг саразыны хъуыды. Уыцы рæстæджы æз хорз зыдтон, цас зындзинæдтæ мæм æнхъæлмæ кæсы, фæлæ æмбæрстон, исчи йæ кæй хъуамæ саарза. Бирæ фæфыдæбон кодтой цæгатирыстойаг коллегæтимæ æмæ нæ хæлæрттимæ Сочийы национ паркæй", — радзырдта Къæбулты Зауыр.
Сочийы нацпарчы биологон зонæдты кандидат Константин Лотиев бафтыдта, ацы рауагъд кæй у Цæгат Кавказы хуыздæр Сырх чингуытæй иу.
Президент схорзæхджын кодта Къæбулты Зауыры, парламент та йæ рахицæн кодта ахуыргонды кады грамотæйæ.