ЦХИНВАЛ, 6 апр — Sputnik, Уалыты Диана. Хуссар Ирыстоны столицæйы хицауады хæдзары актон залы уагъд æрцыд Колыты Аксойы номыл Паддзахадон аивæдты лицейы нывгæнджытæ — ахуыргæнинæгты равдыст. Экспозицийы æвæрд уыдысты чызджыты ирд куыстытæ, кæцытæ æххæст сты нывкæнынады алыгъуызон жанрты æмæ техникæты.
Директор Кæсойты Лаврентий раарфæ кодта æрыгон курдиæттæн сæ дебюты фæдыл æмæ сын йæ цæст бауарзта дарддæры размæцыд се сфæлдыстады.
"Ацы равдыст æрымысыд Хъотайты Елена, кæцы райста йæхимæ хъæппæрис æмæ сорганизаци кодта сывæллæтты куыстыты равдыст. Нывгæнджытæ архайынц алыгъуызон конкурсты, рæзынц æмæ ацы равдыстæн дæттынц стыр нысаниуæг", — загъта уый.
Йе ′нкъарæнтæ равдыстæй адих кодта Хуссар Ирыстоны ахуырады министр Гасситы Натали æмæ нывгæнджыты схорзæхджын кодта ахуырады министрады бузныджы фыстæджытæй.
Дебютанткæтæ баззадысты тынг райгондæй æмæ дзырдтой бузныджы ныхæстæ мадзалы организатортæн.
Цытджын мадзалы кæрон организатортæ равдыстой ныфс, хицауады хæдзары ма ноджыдæр кæй ацæудзысты ирон нывгæнджыты равдысттæ.
"Ацы равдыст у ныр æртыккаг импровизацигонд равдыстон залы. Уый у хæрзифтонг Къацты Вадим æмæ йæ командæйы фæрцы Бибылты Анатолийы комкоммæ финанскæнынадæй. Фæнды нæ равдисын ныфс, президенты администраци нын дарддæр дæр кæй ратдзæн фадат ацы залы равдысттæ ауадзынæн", — банысан кодтой организатортæ.
Уыдон ма загътой бузныг РХИ Национ банчы сæргълæууæгг Зассеты Феликсæн равдыст ауадзынæн финансон æххуысы фæдыл.