ЦХИНВАЛ, 27 апр — Sputnik, Уалыты Диана. Хуссар Ирыстоны центры ацыд бирæпрофилон колледжы фестиваль, цы ран колледжы студенттæ æмæ ахуыргæнджытæ радзырдтой сæ ахуыры æмæ куысты тыххæй, афтæ ма равдыстой чысыл профессионалон мастер-класстæ. Мадзалы хайад райста Бибылты Анатолий æмæ хицауады уæнгтæ, кæцытæ æрзылдысты алы стендыл дæр æмæ æрныхас кодтой студенттимæ.
Колледжы хайадтæ равдыстой сæ куыстытæ æмæ хуыдтой æрбацæудджыты сæ архайдимæ базонгæ кæнынмæ, сæхи ног профессийы сфæлтæрынмæ.
Уæлдай цымыдис сæвзæрын кодта кæсджытæм кулинарон хайады стенд. Кулинарийы амонæг Бежанты Эмма радзырдта, куыд бирæ рæстæг цæттæ кодтой сæхи фестивальмæ æмæ сæ райдианы уырнгæ дæр нæ кодта, ацы хъуыддаг сæ къухты кæй бафтдзæн.
"Мах уынын кæнæм нæ фадæттæ – цы у нæ бон саразын. Цæттæ кодтам бирæ рæстæг, кæд æмæ райдианы стыр ныфс нæ уыд, уæддæр. Фæлæ нын алцыдæр рауад, æрбаластам нæ хæринæгтæ æмæ базонгæ кодтам цхинвайлæгты нæ куыстытимæ", — загъта уый.
Бирæпрофилон колледжы директор Козаты Лира загъта бузныг республикæйы президент Бибылты Анатолий æмæ мадзалмæ æрбацæуджытæн сæ хъусдарды тыххæй, афтæ ма фестиваль сорганизаци кæнынæн чи баххуыс кодта, уыдонæн.
"Цхинвайлаг бирæпрофилон колледж нын балæвар кодта ацы профессионалон дæсниады бæрæгбон æмæ нæ тынг фæнды, цæмæй нын рауайа тынг хорз, уымæн æмæ уый у нывонд у Анатолий Ильяйы фыртæн, уыимæ иумæ æппæт Ирыстонæн. Махæн ис стыр ресурстæ æмæ мæ ныфс ис, мах нæхи хорзæй кæй равдисдзыстæм", — бафтыдта Козаты Лира.
Сывæллæтты коллективтæ равдыстой кæсджытæн сфæлдыстадон номыртæ, амонæг та радзырдта колледжы историйы тыххæй æмæ банысан кодта, студенттæ арæх кæй фæисынц хайад æхсæнадæмон конкурсты, цы ран бацахсынц призон бынæттæ.
Хъӕууонхӕдзарадон техникум колледжмӕ рацарӕзтой 2010 азы, уӕдӕй фӕстӕмӕ фӕзынд бирӕ ӕвӕрццаг ивындзинӕдтӕ йӕ куысты, фӕфылдӕр ис сӕ студентты нымӕц, фӕхуыздӕр сты сӕ уавӕртӕ. Колледжы цæттæ кæны специалистты ахæм къабазты, куыд арæзтад, кулинари, автомеханикæ, электрикæ æмæ æндæрты.