ЦХИНВАЛ, 22 июн — Sputnik. Авдаздзыд Плиты Никольы сфӕлдыстадон изӕр уагъд ӕрцыд Дзӕуджыхъӕуы Националон зонадон библиотекӕйы. Фембӕлды рӕстӕджы спрезентаци кодтой ӕвзонг поэтессӕйы фыццаг чиныг.
Плиты Николь ссис зындгонд ӕппӕт Уӕрӕсейы, конкурс "Лучше всех"-ы хайад куы райста, уый фӕстӕ, фӕлӕ йӕ диссаджы курдиат Николь равдыста конкурсӕй бирӕ раздӕр. Чысыл чызг бирӕ хатт хайад иста алыгъуызон кӕсджыты конкурсты ӕмӕ алыхатт дӕр ахста призон бынӕттӕ. Цыппараздзыдӕй йӕ схорзӕхджын кодтой Паддзахадон думӕйы Уӕрӕсейы тыххӕй ӕмдзӕвгӕтӕ фӕрсыны фӕдыл.
Плиты Никольы чиныджы фыццаг презентаци уагъд ӕрцыд Сырх фӕзуатыл ацы уалдзӕджы, ӕвзонг поэтессӕйы ӕмдзӕвгӕтӕ фарста Мӕскуыйы мэр Сергей Собянин.
Дзӕуджыхъӕуы поэтикон изӕрмӕ ӕртымбыл сты Плиты Никольы курдиат уарзджытӕ, се 'хсӕн Цӕгат Ирыстоны адӕмон поэт Гуырдзыбегты Ирина, Националон зонадон библиотекӕйы директор Хайманты Ирина, Дзӕуджыхъӕуы культурӕ ӕмӕ ахуырады фӕдыл Къамисы сӕрдар Салбиты Зита, "Лучше всех" конкурсы финалист Дарчиты Алекс, поэтикон изӕр та уагъта фӕсивӕдон театр "КВН"-ы директор Плиты Сослан.
Плиты Николь бафарста Александр Пушкин, Федор Тютчев, Роберт Рождественский, Николай Заболоцкий, Иосиф Бродский, Владимир Маяковский ӕмӕ Хетӕгкаты Къостайы ӕмдзӕвгӕтӕ.
Уый фӕстӕ уазджытӕ байхъуыстой Плиты Никольы ӕмдзӕвгӕтӕм дӕр, кӕцытӕ бацыдысты йӕ чиныг "Я научусь жить"-мӕ.