ЦХИНВАЛ, 11 июл — Sputnik, Уалыты Диана. Хуссар Ирыстоны столицӕйы бакодтой ног операцион-хирургон комплекс гемодиализы центримӕ. Республикӕйы цӕрджытӕн уый фӕдыл раарфӕ кӕнынмӕ Цхинвалмӕ ӕрцыдысты Уӕрӕсейы ӕнӕниздзинад хъахъхъӕнынады министрады делегаци ӕмӕ Цӕгат Ирыстоны медиктӕ. Бӕрӕгбонон мадзалы хайад истой РХИ хицауады сӕрдар Пухаты Эрик, ӕнӕниздзинад хъахъхъӕнынады министр Тотчиты Георгий ӕмӕ УФ минӕвар Марат Кулахметов.
Хицауады сӕрдар раарфӕ кодта ӕрӕмбырдуӕвджытӕн ацы нысаниуӕгджын цауы фӕдыл ӕмӕ загъта бузныг Уӕрӕсейӕн республикӕйы медицинӕйы райрӕзтӕн ӕххуысы тыххӕй.
"Инвестицион программӕйы фӕлгӕтты сарӕзтӕуыд бирӕ агъуыстытӕ. Фарон мах бакодтам сывӕллӕтты рынчындон, кӕцыйы ис ног инфонггарз. Ныртӕккӕ ма арӕзт цӕуынц гуырӕн хӕдзар ӕмӕ туберкулезон диспансер. Уыдон иууылдӕр сты Уӕрӕсейы Федерацийы ӕххуысӕй, ӕмӕ сын зӕгъын стыр бузныг", — загъта Пухаты Эрик.
Афтӕ ма УФ ӕнӕниздзинад хъахъхъӕнынады министры ӕххуыссгӕнӕг Дмитрий Костенников дӕр раарфӕ кодта бӕрӕгбоны хайадисджытӕн, медиктӕн та йӕ зӕрдӕ бауарзта хорз ӕнтыстытӕ сӕ куысты.
Бӕрӕгбонон раныхасы фӕстӕ Дмитрий Костенников ӕмӕ Тотчиты Георгий алыг кодтой сырх лентӕ, рынчындоны кусджытӕ та уазджытӕн ауагътой чысыл экскурси.
Комплексы арӕзтад райдыдта ӕртӕ азы размӕ 2015-2017 ӕзты Инвестпрограммӕйы фӕлгӕтты. Объекты арӕзтад фӕцис 2017 азы кӕрӕтты ӕмӕ райдыдта кусын официалон бакондӕй цалдӕр мӕй раздӕр. Комплексы арӕзтадӕн Уӕрӕсейы бюджетӕй рахицӕн кодтой 600 милуан сомӕй фылдӕр, иумӕйагӕй та Хуссар Ирыстоны медицинон комплексты арӕзтадӕн хицӕн ӕрцыд 1,5 миллиард сомӕй фылдӕр.