ЦХИНВАЛ, 14 авг — Sputnik, Плиты Фатимæ. Хуссар Ирыстоны Дзауы районы бавнæлдтой хиды арæзтадмæ Згъубиры хъæумæ, кæцы фæласта ивгъуыд къуыри тæрккъæвдайы фæстиуæгæн донивылд, фехъусын кодтой Sputnik районы администрацийы пресс-службæйы.
Ацы хидыл фæндаг кæны Згъубир æмæ Сбайы хъæутæм, цыппар хæдзар цæры Згъубиры, Сыбайы та дыууæ.
"Бæрзонд хæххон хъæу Згъубирмæ фæндагыл хид фæласта дон тæрккъæвдайы фæстиуæгæн цыппæрæмы. Донивылд цалдæр бон нæ уагъта аразджыты бавналын куыстытæм. Хъæуы цæрджытæ ницæмæй тыхсынц, уым радгæсад хæссынц УУМ кусджытæ. Районы хистæр Махъоты Уырызмæг баныфсæвæрдта, арæзтадон æрмæг цæттæ у æмæ абон райдайдзысты капиталон хид аразын", — загъта пресс-секретарь Тедеты Лиана.
Ивгъуыд къуырийы кæрон тæрккъæвда фæласта фæндæгтæ Чеселт æмæ Едысмæ, Згъубирмæ та донивылд аласта хид.
Дзауы районы хъæуты фылдæр хай сты хæххон бынæтты, уыдомæ фæндæгтæ арæх фæласы донивылд.