ЦХИНВАЛ, 11 сен — Sputnik. Президент Бибылты Анатолий бахӕс кодта сцалцӕг кӕнын Авиацион заводы поселокмӕ фӕндаг ӕмӕ радта ныхас горӕты цӕрӕг сылгоймагӕн, хӕдзар йын кӕй сараздзӕн йӕ мыггаджы хъӕуы.
Республикӕйы сӕргълӕууӕг дыццӕджы райста ӕмбӕстӕгты. Сӕ проблемӕтимӕ президентмӕ бацыдысты Авиацион заводы поселок ӕмӕ микрорайон БАМ-ы ӕмдзӕрӕндоны цӕрджытӕ — иумӕйагӕй 30 адӕймагӕй фылдӕр. Бибылты Анатолиимӕ иумӕ цӕрджытӕм байхъуыстой фӕндӕгты арӕзтады фӕдыл комитеты сӕрдар Гуыззыттаты Эдуард ӕмӕ Цхинвалы мэрийы цӕрӕн-эксплуатацион къамисы (ЦЭК) хистӕр Хъуылымбегты Роберт.
Президенты пресс-службӕ хъусын кӕны, зӕгъгӕ, Авиацион заводы поселочы цӕрджытӕ бадзырдтой президентмӕ, цӕмӕй сын сӕ фӕндаг сцалцӕг кӕна, афтӕ ма баива дуӕрттӕ ӕмӕ рудзгуытӕ бирӕфатерон хӕдзӕртты.
Бибылты Анатолий загъта Гуыззыттаты Эдуардӕн, цӕмӕй аскъуыддзаг кӕна цӕрджыты проблемӕтӕ. Ӕмдзӕрӕндоны цӕрджытӕ радзырдтой сӕ хӕлд канализацийы тыххӕй президентӕн.
Президент загъта ЦЭК хистӕрӕн дыууӕ къуыримӕ аиуварс кӕнын канализациимӕ проблемӕтӕ.
Лолоты Асмат, кӕцы цӕры ӕмдзӕрӕндоны, радзырдта паддзахады сӕргълӕууӕгӕн, кӕй йӕ фӕнды ацӕуын цӕрынмӕ Цхинвалы районы йӕ райгуырӕн хъӕу Дменисмӕ. Президент ныхас радта, кӕй сараздзӕн Лолоты Асмат ӕмӕ йӕ бинонтӕн хӕдзар Дменисы хъӕуы.