ЦХИНВАЛ, 19 сен — Sputnik. Тыбылты Алыксандры номыл Хуссар Ирыстоны паддзахадон университет сараздзӕн проектты комплекс, кӕцытӕ схизын кӕндзысты Хуссар Ирыстоны зонад ног ӕмвӕзадмӕ, фехъусын кодта ахуыргӕнӕндоны пресс-службӕ.
ХИПУ-йы ректор Тедеты Вадимы уынаффӕмӕ гӕсгӕ, кӕцы уый рахаста республикӕйы президент Бибылты Анатолиимӕ кусӕгон фембӕлды фӕстӕ, ахуыргӕнӕндоны фӕзындзӕн ирӕтты этникон истори ӕмӕ Нарты ахуырады центр.
Центр саразыны фӕдыл хъӕппӕрис бахаста Ирыстоны истори ӕмӕ Кавказы ахуырады кафедрайы гӕс, профессор Гаглойты Юрий.
"Ацы проектӕй дарддӕр университеты телеуынынады базӕйыл реализаци кӕнынц ӕндӕр проект — зындгонд историкты, нарты каджыты зонджытӕ ӕмӕ лингвистты лекцитӕ фыссынц видеойыл, цӕмӕй сӕ стӕй бавдисой регионалон ӕмӕ дунейон электронон фӕрӕзты", — банысан кодтой ахуыргӕнӕндоны пресс-службӕйы.
Афтӕ ма ректор банхъардта физико-математикон зонӕдты профессор Тедеты Анатолийӕн слӕууын математикӕйы кафедрӕйы сӕргъ ӕмӕ саразын ХИПУ-йы математикон скъола.
Ноябры та нывӕндынц саразын университетон зонадон журнал фыдыбӕстон истори ӕмӕ ӕхсӕнадӕмон ахастыты фӕдыл.